បាចិត្តិយកថា

៨៨៩. សម្បជានមុសាវាទេ, បាចិត្តិយមុទីរិតំ;

ទវា រវា ភណន្តស្ស, ន ទោសុម្មត្តកាទិនោ.

៨៩០. អញ្ញត្ថាបត្តិយោ បញ្ច, មុសាវាទស្ស ការណា;

សមុដ្ឋានាទយោ សព្ពេ, អទិន្នាទានតុល្យកា.

សម្បជានមុសាវាទកថា.

៨៩១. ជាតិអាទីសុ វុត្តេសុ, ទសស្វក្កោសវត្ថុសុ;

ភូតេន វា អភូតេន, យេន កេនចិ វត្ថុនា.

៨៩២. យាយ កាយចិ ភាសាយ, ហត្ថមុទ្ទាយ វា បន;

បារាជិកមនាបន្នំ, ភិក្ខុមាបន្នមេវ វា.

៨៩៣. អញ្ញត្រញ្ញាបទេសេន, ឱមសន្តស្ស ភិក្ខុនោ;

តត្ថ បាចិត្តិយាបត្តិ, សម្ពុទ្ធេន បកាសិតា.

៨៩៤. តេហេវញ្ញាបទេសេន, បាឡិមុត្តបទេហិបិ;

សព្ពត្ថានុបសម្បន្នំ, អក្កោសន្តស្ស ទុក្កដំ.

៨៩៥. អនក្កោសិតុកាមស្ស, កេវលំ ទវកម្យតា;

វទតោ បន សព្ពត្ថ, ទុព្ភាសិតមុទីរិតំ.

៨៩៦. បវិដ្ឋានុបសម្បន្ន-ដ្ឋានេ ឥធ ច ភិក្ខុនី;

អនាបត្តិ បុរក្ខត្វា, អត្ថធម្មានុសាសនិំ.

៨៩៧. វទតោ បន ភិក្ខុស្ស, សមុដ្ឋានាទយោ នយា;

អនន្តរសមា វុត្តា, ទុក្ខា ហោតេត្ថ វេទនា.

ឱមសវាទកថា.

៨៩៨. អាបត្តិ ភិក្ខុបេសុញ្ញេ, ទុវិធាការតោ សិយា;

អត្តនោ បិយកាមស្ស, បរភេទត្ថិនោបិ វា.

៨៩៩. អក្កោសន្តស្ស បរិយាយ-បាឡិមុត្តនយេហិ ច;

វចនស្សុបសំហារេ, ហោតិ អាបត្តិ ទុក្កដំ.

៩០០. តថា អនុបសម្បន្ន-អក្កោសំ ហរតោបិ ច;

ឋិតា អនុបសម្បន្ន-ដ្ឋានេ ឥធ ច ភិក្ខុនី.

៩០១. ន ចេវ បិយកាមស្ស, ន ច ភេទត្ថិនោបិ វា;

បាបានំ គរហត្ថាយ, វទន្តស្ស ច ភិក្ខុនោ.

៩០២. តថា ឧម្មត្តកាទីនំ, អនាបត្តីតិ ទីបិតា;

សមុដ្ឋានាទយោ សព្ពេ, អទិន្នាទានសាទិសា.

បេសុញ្ញកថា.

៩០៣. ឋបេត្វា ភិក្ខុនិំ ភិក្ខុំ, អញ្ញេន បិដកត្តយំ;

ធម្មំ សហ ភណន្តស្ស, តស្ស បាចិត្តិយំ សិយា.

៩០៤. រាជោវាទាទយោ វុត្តា, មហាបច្ចរិយាទិសុ;

អនារុឡ្ហេសុ សង្គីតិំ, អាបត្តិជនកាតិ ហិ.

៩០៥. ទុក្កដំ ហោតិ ភិក្ខុស្មិំ, តថា ភិក្ខុនិយាបិ ច;

ភិក្ខុស្សានុបសម្បន្ន-សញ្ញិនោ វិមតិស្ស វា.

៩០៦. ឯកតោ ឧទ្ទិសាបេតិ, សជ្ឈាយំ វា ករោតិ យោ;

ភណន្តំ បគុណំ គន្ថំ, ឱបាតេតិ ច យោ បន.

៩០៧. តស្ស ចានុបសម្បន្ន-សន្តិកេ គណ្ហតោបិ ច;

ឧទ្ទេសំ តុ អនាបត្តិ, ភណនេ តេន ឯកតោ.

៩០៨. វាចតោ ច សមុដ្ឋាតិ, វាចាចិត្តទ្វយាបិ ច;

សមុដ្ឋានមិទំ វុត្តំ, បទសោធម្មសញ្ញិតំ.

បទសោធម្មកថា.

៩០៩. សព្ពច្ឆន្នបរិច្ឆន្នេ, និបជ្ជេយ្យ សចេ បន;

យេភុយ្យេន បរិច្ឆន្នេ, ឆន្នេ សេនាសនេបិ វា.

៩១០. តិស្សន្នំ បន រត្តីនំ, ឧទ្ធំ យោ បន រត្តិយំ;

ឋបេត្វា ភិក្ខុំ អញ្ញេន, តស្ស បាចិត្តិយំ សិយា.

៩១១. វត្ថុំ យំ បន និទ្ទិដ្ឋំ, មេថុនស្ស បហោនកំ;

អាបត្យន្តមសោ តេន, តិរច្ឆានគតេនបិ.

៩១២. និបន្នេ ឧបសម្បន្នេ, ឥតរោ ចេ និបជ្ជតិ;

ឥតរស្មិំ និបន្នេ វា, សចេ ភិក្ខុ និបជ្ជតិ.

៩១៣. ឧភិន្នំ ឧដ្ឋហិត្វា វា, និបជ្ជនបយោគតោ;

អាបត្តានុបសម្បន្ន-គណនាយបិ វា សិយា.

៩១៤. សចេ បិធាយ វា គព្ភំ, និបជ្ជតិបិធាយ វា;

អាបត្តត្ថង្គតេ សូរិយេ, ចតុត្ថទិវសេ សិយា.

៩១៥. ទិយឌ្ឍហត្ថុព្ពេធេន, បាការចយនាទិនា;

បរិក្ខិត្តម្បិ តំ សព្ពំ, បរិក្ខិត្តន្តិ វុច្ចតិ.

៩១៦. ភិក្ខុស្សន្តមសោ ទុស្ស-កុដិយំ វសតោបិ ច;

សហសេយ្យាយ អាបត្តិ, ហោតីតិ បរិទីបិតោ.

៩១៧. សព្ពច្ឆន្នបរិច្ឆន្ន-យេភុយ្យាទិប្បភេទតោ;

សត្ត បាចិត្តិយានេត្ថ, ទដ្ឋព្ពានិ សុពុទ្ធិនា.

៩១៨. អឌ្ឍច្ឆន្នបរិច្ឆន្នេ, ទុក្កដំ បរិទីបិតំ;

សព្ពចូឡបរិច្ឆន្ន-ឆន្នាទីហិបិ បញ្ចធា.

៩១៩. អនាបត្តិ ទិរត្តំ វា, តិរត្តំ វសតោ សហ;

អរុណស្ស បុរេយេវ, តតិយាយ ច រត្តិយា.

៩២០. និក្ខមិត្វា វសន្តស្ស, បុន សទ្ធិញ្ច ភិក្ខុនោ;

តថា សព្ពបរិច្ឆន្ន-សព្ពច្ឆន្នាទិកេបិ ច.

៩២១. ឯវំ អនុបសម្បន្នេ, និបន្នេបិ និសីទតោ;

សេសា ឯឡកលោមេន, សមុដ្ឋានាទយោ សមា.

សហសេយ្យកថា.

៩២២. សចេ តទហុជាតាយ, អបិ យោ មានុសិត្ថិយា;

សហសេយ្យំ បកប្បេយ្យ, តស្ស បាចិត្តិយំ សិយា.

៩២៣. ទិស្សមានករូបាយ, យក្ខិយា បេតិយា សហ;

រត្តិយំ យោ និបជ្ជេយ្យ, ទេវិយា បណ្ឌកេន វា.

៩២៤. មេថុនវត្ថុភូតាយ, តិរច្ឆានគតិត្ថិយា;

វត្ថូនំ គណនាយស្ស, ហោតិ អាបត្តិ ទុក្កដំ.

៩២៥. ឥធេកទិវសេនេវ, អាបត្តិ បរិទីបិតា;

សេសោ អនន្តរេ វុត្ត-សទិសោវ វិនិច្ឆយោ.

ទុតិយសហសេយ្យកថា.

៩២៦. ឧទ្ធំ ឆប្បញ្ចវាចាហិ, វិញ្ញុំ បុរិសវិគ្គហំ;

វិនា ធម្មំ ភណន្តស្ស, ហោតិ បាចិត្តិ ឥត្ថិយា.

៩២៧. គាថាបាទោ បនេកោវ, ឯកវាចាតិ សញ្ញិតោ;

បទសោធម្មំ និទ្ទិដ្ឋំ, ធម្មមដ្ឋកថម្បិ វា.

៩២៨. ឆន្នំ ឧបរិ វាចានំ, បទាទីនំ វសា បន;

ទេសេន្តស្ស សិយាបត្តិ, បទាទិគណនាយ ច.

៩២៩. និម្មិនិត្វា ឋិតេនាបិ, សទ្ធិំ បុរិសវិគ្គហំ;

យក្ខេនបិ ច បេតេន, តិរច្ឆានគតេនបិ.

៩៣០. ឋិតស្ស មាតុគាមស្ស, ធម្មំ យោ បន ភាសតិ;

ឆន្នំ ឧបរិ វាចានំ, តស្ស បាចិត្តិយំ សិយា.

៩៣១. បុរិសេ ឥត្ថិសញ្ញិស្ស, វិមតិស្ស ច បណ្ឌកេ;

ឧត្តរិ ឆហិ វាចាហិ, វទតោ ហោតិ ទុក្កដំ.

៩៣២. ឥត្ថិរូបំ គហេត្វាន, ឋិតានំ ភាសតោបិ ច;

ទុក្កដំ យក្ខិបេតីនំ, តិរច្ឆានគតិត្ថិយា.

៩៣៣. បុរិសេ សតិ វិញ្ញុស្មិំ, សយំ ឧដ្ឋាយ វា បុន;

ទេសេន្តស្ស និសីទិត្វា, មាតុគាមស្ស វា តថា.

៩៣៤. អញ្ញិស្សា បុន អញ្ញិស្សា, ឥត្ថិយា ភណតោបិ ច;

ឆហិ បញ្ចហិ វាចាហិ, អនាបត្តិ បកាសិតា.

៩៣៥. បទសោធម្មតុល្យាវ, សមុដ្ឋានាទយោ មតា;

អយមេវ វិសេសោតិ, ក្រិយាក្រិយមិទំ បន.

ធម្មទេសនាកថា.

៩៣៦. មហគ្គតំ បណីតំ វា, អារោចេន្តស្ស ភិក្ខុនោ;

ឋបេត្វា ភិក្ខុនិំ ភិក្ខុំ, ភូតេ បាចិត្តិយំ សិយា.

៩៣៧. នោ ចេ ជានាតិ សោ វុត្តំ, អារោចេន្តស្ស ភិក្ខុនោ;

បរិយាយវចនេ ចស្ស, ហោតិ អាបត្តិ ទុក្កដំ.

៩៣៨. អនាបត្តិ តថារូបេ, ការណេ សតិ ភាសតោ;

សព្ពស្សបិ ច សីលាទិំ, វទតោ អាទិកម្មិនោ.

៩៣៩. ឧម្មត្តកបទំ ឯត្ថ, ន វុត្តំ តទសម្ភវា;

ភូតារោចនកំ នាម, សមុដ្ឋានមិទំ មតំ.

៩៤០. កាយតោ វាចតោ កាយ-វាចតោ ច តិធា សិយា;

កុសលាព្យាកតេហេវ, ទ្វិចិត្តញ្ច ទ្វិវេទនំ.

ភូតារោចនកថា.

៩៤១. អាបត្តិំ បន ទុដ្ឋុល្លំ, អារោចេន្តស្ស ភិក្ខុនោ;

អាបត្តានុបសម្បន្នេ, ឋបេត្វា ភិក្ខុសម្មុតិំ.

៩៤២. សង្ឃាទិសេសមាបន្នោ, មោចេត្វា អសុចិំ អយំ;

ឃដេត្វា វត្ថុនាបត្តិំ, វទន្តស្សេវ វជ្ជតា.

៩៤៣. ឥធ សង្ឃាទិសេសាវ, ទុដ្ឋុល្លាបត្តិយោ មតា;

តស្មា សុទ្ធស្ស ទុដ្ឋុល្លំ, វទំ បាចិត្តិយំ ផុសេ.

៩៤៤. អទុដ្ឋុល្លាយ ទុដ្ឋុល្ល-សញ្ញិនោ វិមតិស្ស វា;

អាបត្តិយោបិ វា សេសា, អារោចេន្តស្ស ទុក្កដំ.

៩៤៥. តថា អនុបសម្បន្នេ, ទុដ្ឋុល្លំ បញ្ចធា មតំ;

អជ្ឈាចារមទុដ្ឋុល្លំ, អារោចេតុំ ន វដ្ដតិ.

៩៤៦. វត្ថុំ វា បន អាបត្តិំ, អារោចេន្តស្ស កេវលំ;

អនាបត្តីតិ ញាតព្ពំ, ភិក្ខុសម្មុតិយា តថា.

៩៤៧. ឯវមុម្មត្តកាទីនំ, សមុដ្ឋានាទយោ នយា;

អទិន្នាទានតុល្យាវ, វេទនា ទុក្ខវេទនា.

ទុដ្ឋុល្លារោចនកថា.

៩៤៨. ខណេយ្យ វា ខណាបេយ្យ, បថវិំ យោ អកប្បិយំ;

ភេទាបេយ្យ ច ភិន្ទេយ្យ, តស្ស បាចិត្តិយំ សិយា.

៩៤៩. សយមេវ ខណន្តស្ស, បថវិំ បន ភិក្ខុនោ;

បហារស្មិំ បហារស្មិំ, បាចិត្តិយមុទីរិតំ.

៩៥០. អាណាបេន្តស្ស ឯកាវ, ទិវសំ ខណតោបិ ច;

បុនប្បុនាណាបេន្តស្ស, វាចតោ វាចតោ សិយា.

៩៥១. ‘‘ខណ បោក្ខរណិំ វាបិំ, អាវាដំ ខណ កូបកំ’’;

ឥច្ចេវំ តុ វទន្តស្ស, កោចិ ទោសោ ន វិជ្ជតិ.

៩៥២. ‘‘ឥមំ ខណ ច ឱកាសំ, ឥធ បោក្ខរណិំ ខណ;

ឥមស្មិំ ខណ ឱកាសេ’’, វត្តុមេវំ ន វដ្ដតិ.

៩៥៣. ‘‘កន្ទំ ខណ កុរុន្ទំ វា, ថូណំ ខណ ច ខាណុកំ;

មូលំ ខណ ច តាលំ វា’’, ឯវំ វទតិ វដ្ដតិ.

៩៥៤. ‘‘ឥមំ មូលំ ឥមំ វល្លិំ, ឥមំ តាលំ ឥមំ នឡំ;

ខណា’’តិ និយមេត្វាន, វត្តុំ បន ន វដ្ដតិ.

៩៥៥. ឧស្សិញ្ចិតុំ សចេ សក្កា, ឃដេហិ តនុកទ្ទមោ;

ភិក្ខុនា អបនេតព្ពោ, ពហលំ ន ច វដ្ដតិ.

៩៥៦. ភិជ្ជិត្វា នទិយាទីនំ, បតិតំ តោយសន្តិកេ;

តដំ វដ្ឋំ វិកោបេតុំ, ចាតុមាសម្បិ វដ្ដតិ.

៩៥៧. សចេ បតតិ តោយស្មិំ, ទេវេ វុដ្ឋេបិ វដ្ដតិ;

ចាតុមាសមតិក្កន្តេ, តោយេ ទេវោ ហិ វស្សតិ.

៩៥៨. បាសាណបិដ្ឋិយំ សោណ្ឌិំ, ខណន្តិ យទិ តត្ថ តុ;

រជំ បតតិ ចេ បុព្ពំ, បច្ឆា ទេវោភិវស្សតិ.