និស្សគ្គិយកថា

៥៥១. ខោមំ កប្បាសកោសេយ្យំ, សាណំ ភង្គញ្ច កម្ពលំ;

ចីវរំ ឆព្ពិធំ វុត្តំ, ជាតិតោ បន កប្បិយំ.

៥៥២. ទុកូលញ្ចេវ បត្តុណ្ណំ, ចិនំ សោមារបដ្ដកំ;

ឥទ្ធិជំ ទេវទិន្នញ្ច, តស្សេតំ អនុលោមិកំ.

៥៥៣. តិចីវរំ បរិក្ខារ-ចោឡញ្ច មុខបុញ្ឆនំ;

និសីទនមធិដ្ឋេយ្យ, បច្ចត្ថរណមេវ ច.

៥៥៤. ឯកាហម្បិ វិនា ភិក្ខុ, ន វសេយ្យ តិចីវរំ;

ន វសេយ្យ តថាធិដ្ឋា, ចាតុមាសំ និសីទនំ.

៥៥៥. រជិត្វា កប្បិយំ ពិន្ទុំ, ទត្វា តត្ថ តិចីវរំ;

ឧបបន្នំ បមាណេន, អធិដ្ឋាតព្ពមេវ តំ.

៥៥៦. បច្ឆិមន្តេន សង្ឃាដិ, ទីឃសោ មុដ្ឋិបញ្ចកា;

មុដ្ឋិត្តិកា ច តិរិយំ, ឧត្តមន្តេន សា បន.

៥៥៧. សត្ថុនោ ចីវរូនាបិ, វដ្ដតីតិ បកាសិតា;

ឥទមេវុត្តរាសង្គេ, បមាណំ បរិទីបិតំ.

៥៥៨. មុដ្ឋិបញ្ចកំ ទីឃន្តំ, បមាណំ តិរិយន្តតោ;

អឌ្ឍតេយ្យំ ទ្វិហត្ថំ វា, សេសេ អន្តរវាសកេ.

៥៥៩. អហតាហតកប្បានំ, សង្ឃាដិ ទិគុណា មតា;

ឯកបដ្ដុត្តរាសង្គោ, ឯវមន្តរវាសកោ.

៥៦០. ឧតុទ្ធដានំ បន ចីវរានំ;

សង្ឃាដិ ភិក្ខុស្ស ចតុគ្គុណា វា;

ទុវេបិ សេសា ទិគុណាវ វុត្តា;

យថាសុខំ វដ្ដតិ បំសុកូលំ.

៥៦១. តីណិបិ ទ្វេបិ ចេកំ វា, ឆិន្ទិតព្ពំ បហោតិ ចេ;

សព្ពេសុ អប្បហោន្តេសុ, ទេយ្យមន្វាធិកម្បិ វា.

៥៦២. អច្ឆិន្នំ វា អនាទិន្នំ, ធារេន្តស្ស តិចីវរំ;

ភិក្ខុនោ ទុក្កដំ វុត្តំ, ទុព្ភោគេន ច សេវតោ.

៥៦៣. កុសិំ អឌ្ឍកុសិញ្ចាបិ, មណ្ឌលំ អឌ្ឍមណ្ឌលំ;

វិវដ្ដំ អនុវិវដ្ដំ, ពាហន្តម្បិ ច ភិក្ខុនោ.

៥៦៤. ទស្សេត្វាវ វិធិំ សព្ពំ, បញ្ចកាទិប្បភេទកំ;

ឆិន្នំ សមណសារុប្បំ, កាតព្ពំ តុ តិចីវរំ.

៥៦៥. ទានេនច្ឆិជ្ជគាហេន, វិស្សាសគ្គហណេន ច;

ហីនាយាវត្តនេនាបិ, សិក្ខាយ ច បហានតោ.

៥៦៦. បច្ចុទ្ធារវិនាសេហិ, លិង្គស្ស បរិវត្តនា;

សព្ពំ ភិជ្ជតិធិដ្ឋានំ, ឆិទ្ទភាវេ តិចីវរំ.

៥៦៧. កនិដ្ឋស្សង្គុលស្សេវ, នខបិដ្ឋិប្បមាណកំ;

វិនិវិទ្ធំ បនច្ឆិទ្ទ-មធិដ្ឋានវិនាសនំ.

៥៦៨. ឯកោ តន្តុបិ អច្ឆិន្នោ, អធិដ្ឋានំ ន ភិន្ទតិ;

សេតភាវំ ករោន្តេន, ធោតម្បិ រជកេន វា.

៥៦៩. បឋមំ អគ្គឡំ ទត្វា, បច្ឆា ឆិន្ទតិ រក្ខតិ;

ឃដេត្វា កោដិយោ ទ្វេ វា, បច្ឆា ឆិន្ទតិ រក្ខតិ.

៥៧០. ចតុរដ្ឋង្គុលា ឱរំ, ឯកទ្វិន្នំ តិរីយតោ;

តិណ្ណម្បិ ទីឃតោ ឆិទ្ទំ, ភិន្ទតេវ វិទត្ថិយា.

៥៧១. និសីទនស្ស ទីឃេន, ភវន្តិ ទ្វេ វិទត្ថិយោ;

វិត្ថារេន ទិយឌ្ឍា ច, សុគតស្ស វិទត្ថិយា.

៥៧២. ហោន្តិ កណ្ឌុប្បដិច្ឆាទិ, តិរិយំ ទ្វេ វិទត្ថិយោ;

ទីឃតោបិ ចតស្សោវ, សុគតស្ស វិទត្ថិយា.

៥៧៣. ទីឃតោ សុគតស្សេវ, ភវន្តិ ឆ វិទត្ថិយោ;

វិត្ថារេនឌ្ឍតេយ្យាវ, សិយា វស្សិកសាដិកា.

៥៧៤. មុនិនា តីសុ ឯតេសុ, ករោន្តស្ស តទុត្តរិំ;

អធិកច្ឆេទនំ តស្ស, បាចិត្តិយមុទីរិតំ.

៥៧៥. មុខបុញ្ឆនចោឡស្ស, បច្ចត្ថរណកស្ស វា;

បមាណំ អប្បមាណេន, ន ចេវ បរិទីបិតំ.

៥៧៦. សទសំ អទសំ សព្ពំ, បច្ចត្ថរណចីវរំ;

មហន្តំ ខុទ្ទកំ ឯក-មនេកម្បិ ច វដ្ដតិ.

៥៧៧. មុខបុញ្ឆនចោឡេកំ, ទ្វេបិ វដ្ដន្តិ សព្ពថា;

សទសំ អទសំ វាបិ, សទសំវ និសីទនំ.

៥៧៨. អទសា រជិតាយេវ, វដ្ដតាទិន្នកប្បកា;

វុត្តា កណ្ឌុប្បដិច្ឆាទិ, តថា វស្សិកសាដិកា.

៥៧៩. គណនំ វា បមាណំ វា, ន បរិក្ខារចោឡកេ;

បមាណគណនាតីតិ, ភណន្តិ បកតញ្ញុនោ.

៥៨០. សុគតដ្ឋង្គុលាយាមំ, ចតុរង្គុលវិត្ថតំ;

វិកប្បនុបគំ ហោតិ, បច្ឆិមំ នាម ចីវរំ.

៥៨១. បរិស្សាវបដំ បត្ត-បោត្ថកត្ថវិកាទិកំ;

អធិដ្ឋេយ្យ បរិក្ខារ-ចោឡំ បច្ឆិមចីវរំ.

៥៨២. ពហូនិ ឯកតោ កត្វា, អធិដ្ឋាតុម្បិ វដ្ដតិ;

មាតុអាទីនមត្ថាយ, ឋបិតេ នត្ថិ ទោសតា.

៥៨៣. វស្សមាសេ អធិដ្ឋេយ្យ, ចតុរោ វស្សសាដិកំ;

បុន បច្ចុទ្ធរិត្វា តំ, វិកប្បេយ្យ តតោ បរំ.

៥៨៤. តាវ កណ្ឌុប្បដិច្ឆាទិំ, យាវ រោគោ ន សម្មតិ;

អធិដ្ឋហិត្វា តតោ ឧទ្ធំ, ឧទ្ធរិត្វា វិកប្បយេ.

៥៨៥. ‘‘ឥមំ កណ្ឌុប្បដិច្ឆាទិំ, ឥមមន្តរវាសកំ;

អធិដ្ឋាមី’’តិធិដ្ឋេយ្យ, សេសេសុបិ អយំ នយោ.

៥៨៦. ‘‘ឥមំ កណ្ឌុប្បដិច្ឆាទិំ, ឯត’’ន្តិ ច អសម្មុខេ;

វត្វា បច្ចុទ្ធរេយ្យេវំ, សេសេសុបិ វិចក្ខណោ.

៥៨៧. អាភោគំ មនសា កត្វា, កាយេន ផុសនាកតំ;

វចសាធិដ្ឋិតញ្ចាតិ, អធិដ្ឋានំ ទ្វិធា មតំ.

៥៨៨. ឥតិ សព្ពមិទំ វុត្តំ, តេចីវរិកភិក្ខុនោ;

តថា វត្វាវធិដ្ឋេយ្យ, តំ បរិក្ខារចោឡិកោ.

៥៨៩. តិចីវរំ បរិក្ខារ-ចោឡំ កាតុម្បិ វដ្ដតិ;

ឯវំ ចុទោសិតេ វុត្តោ, បរិហារោ និរត្ថកោ.

៥៩០. ន, តេចីវរិកស្សេវ, វុត្តត្តា តត្ថ សត្ថុនា;

តំ បរិក្ខារចោឡស្ស, តស្មា សព្ពម្បិ វដ្ដតិ.

៥៩១. ‘‘អធិដ្ឋេតិ វិកប្បេតិ, អនាបត្តី’’តិ ឯត្ថ ច;

អធិដ្ឋាតព្ពកស្សេវ, វិកប្បនវិធានតោ.

៥៩២. ភិក្ខុស្សេវំ ករោន្តស្ស, ន ទោសោ ឧបលព្ភតិ;

ឯវញ្ច ន សិយា កស្មា, មុខបុញ្ឆនកាទិកំ.

៥៩៣. មុខបុញ្ឆនកាទីនំ, តេសំ កិច្ចវិធានតោ;

អកិច្ចស្សាមិកស្សស្ស, អធិដ្ឋានំ តុ យុជ្ជតិ.

៥៩៤. និធានមុខមេតន្តិ, មហាបច្ចរិយំ បន;

វុត្តត្តា ច និសេធេតុំ, ន សក្កា វិនយញ្ញុនា.

៥៩៥. ចីវរំ បរិបុណ្ណន្តិ, និទានុប្បត្តិតោបិ ច;

និធានមុខមេតន្តិ, វេទិតព្ពំ វិភាវិនា.

៥៩៦. កុសវាកាទិចីរានិ, កម្ពលំ កេសវាលជំ;

ថុល្លច្ចយំ ធារយតោ-លូកបក្ខាជិនក្ខិបេ.

៥៩៧. កទលេរកទុស្សេសុ, អក្កទុស្សេ ច បោត្ថកេ;

ទុក្កដំ តិរិដេ វាបិ, វេឋនេ កញ្ចុកេបិ ច.

៥៩៨. សព្ពនីលកមញ្ជេដ្ឋ-កណ្ហលោហិតបីតកេ;

មហានាមមហារង្គ-រត្តេសុបិ ច ទុក្កដំ.

៥៩៩. អច្ឆិន្នទសកេ ទីឃ-ផលបុប្ផទសេសុ ច;

អច្ឆិន្នចីវរស្សេត្ថ, នត្ថិ កិញ្ចិ អកប្បិយំ.

៦០០. អធិដ្ឋេតិ វិកប្បេតិ, វិស្សជ្ជេតិ វិនស្សតិ;

អន្តោទសាហំ វិស្សាសេ, អនាបត្តិ បកាសិតា.

៦០១. កថិនំ នាម នាមេន, សមុដ្ឋានមិទំ បន;

អចិត្តមក្រិយំ វុត្តំ, តិចិត្តញ្ច តិវេទនំ.

បឋមកថិនកថា.

៦០២. គាមាទីសុ បទេសេសុ, តិបញ្ចសុ តិចីវរំ;

ឋបេត្វា ឯករត្តម្បិ, សង្ឃសម្មុតិយា វិនា.

៦០៣. ភិក្ខុនោ បន តេនស្ស, វិប្បវត្ថុំ ន វដ្ដតិ;

ហោតិ និស្សគ្គិយំ វិប្ប-វសតោ អរុណុគ្គមេ.

៦០៤. ចីវរំ និក្ខិបិត្វាន, ន្ហាយន្តស្សេវ រត្តិយំ;

អរុណេ ឧដ្ឋិតេ កិំ នុ, កាតព្ពំ តេន ភិក្ខុនា.

៦០៥. ទុក្កដំ មុនិនា វុត្តំ, និស្សគ្គិយនិវាសនេ;

តព្ភយា បន សោ ភិក្ខុ, នគ្គោ គច្ឆតិ ទុក្កដំ.

៦០៦. អច្ឆិន្នចីវរដ្ឋានេ, ឋិតត្តា បន ភិក្ខុនោ;

ន តស្សាកប្បិយំ នាម, ចីវរំ អត្ថិ កិញ្ចិបិ.

៦០៧. និគាសេត្វា គហេត្វា ច, គន្ត្វា ភិក្ខុស្ស សន្តិកំ;

និស្សជ្ជិត្វា បនាបត្តិ, ទេសេតព្ពាវ វិញ្ញុនា.

៦០៨. បរស្ស និស្សជ្ជិត្វា តំ, ទុក្កដំ បរិភុញ្ជតោ;

បយោគេ ច បយោគេ ច, ហោតិ បារុបនាទិសុ.

៦០៩. អនាបត្តិ តមញ្ញស្ស, ភិក្ខុនោ បរិភុញ្ជតោ;

អទេន្តស្ស ច និស្សដ្ឋំ, ទុក្កដំ បរិយាបុតំ.

៦១០. ថេរេ ច ទហរេ មគ្គំ, គច្ឆន្តេសុ ឧភោសុបិ;

បត្តចីវរមាទាយ, ឱហីនេ ទហរេ បន.

៦១១. អសម្បត្តេ គរុំ តស្មិំ, ឧគ្គច្ឆត្យរុណោ យទិ;

ហោតិ និស្សគ្គិយំ វត្ថំ, ន បស្សម្ភតិ និស្សយោ.

៦១២. មុហុត្តំ វិស្សមិត្វាន, គច្ឆន្តេ ទហរេ បន;

ហោតិ និស្សគ្គិយំ វត្ថំ, បស្សម្ភតិ ច និស្សយោ.

៦១៣. សុតា ធម្មកថា យស្មិំ, ឧគ្គច្ឆត្យរុណោ យទិ;

ហោតិ និស្សគ្គិយំ វត្ថំ, បស្សម្ភតិ ច និស្សយោ.

៦១៤. បច្ចុទ្ធារេ អនាបត្តិ, លទ្ធសម្មុតិកស្សបិ;

អន្តោយេវារុណេ តំ វា, វិស្សជ្ជេតិ វិនស្សតិ.

៦១៥. បឋមេន សមានាវ, សមុដ្ឋានាទយោ នយា;

អបច្ចុទ្ធរណំ ឯត្ថ, អក្រិយាតិ វិសេសិតំ.

ទុតិយកថិនកថា.

៦១៦. អកាលចីវរំ មាស-បរមំ និក្ខិបេ សតិ;

បច្ចាសាយ តតោ ឧទ្ធំ, ឋបេតុំ ន ច វដ្ដតិ.

៦១៧. ទសាហាតិក្កមោយេវ;

បឋមេ កថិនេ ឥធ;

មាសស្សាតិក្កមោ វុត្តោ;

សេសោ តេន សមោ មតោ.

តតិយកថិនកថា.

៦១៨. ភិក្ខុ ភិក្ខុនិយា ភុត្តំ, វត្ថំ អញ្ញាតិកាយ យោ;

ធោវាបេតិ រជាបេតិ, អាកោដាបេតិ ចេ តតោ.

៦១៩. តស្ស និស្សគ្គិយាបត្តិ, បឋមេន បកាសិតា;

តថា សេសេហិ ច ទ្វីហិ, ទីបិតំ ទុក្កដទ្វយំ.

៦២០. សិក្ខមានាយ វា ហត្ថេ, ធោវនត្ថាយ ទេតិ ចេ;

សា ហុត្វា ឧបសម្បន្នា, បច្ឆា ធោវតិ សោ នយោ.

៦២១. សាមណេរនិទ្ទេសេបិ, លិង្គំ ចេ បរិវត្តតិ;

ភិក្ខុនីសុបសម្បជ្ជ, ធោតេ និស្សគ្គិយំ សិយា.