អនិយតកថា

៥៤២. រហោ និសជ្ជស្សាទេន, មាតុគាមស្ស សន្តិកំ;

គន្តុកាមោ និវាសេតិ, អក្ខិំ អញ្ជេតិ ភុញ្ជតិ.

៥៤៣. បយោគេ ច បយោគេ ច, ហោតិ សព្ពត្ថ ទុក្កដំ;

គច្ឆតោ បទវារេន, គន្ត្វា ចស្ស និសីទតោ.

៥៤៤. និសជ្ជាយ ឧភិន្នម្បិ, បយោគគណនាយ ច;

ហោតិ បាចិត្តិយំ តស្ស, ពហុកានិ ពហូស្វបិ.

៥៤៥. សមីបេបិ ឋិតោ អន្ធោ, អន្តោទ្វាទសហត្ថកេ;

ន ករោតិ អនាបត្តិំ, ឥត្ថីនំ តុ សតម្បិ ច.

៥៤៦. ចក្ខុមាបិ និបជ្ជិត្វា, និទ្ទាយន្តោបិ កេវលំ;

ទ្វារេ បិហិតគព្ភស្ស, និសិន្នោបិ ន រក្ខតិ.

៥៤៧. អនន្ធេ សតិ វិញ្ញុស្មិំ, ឋិតស្សារហសញ្ញិនោ;

និសជ្ជបច្ចយា ទោសោ, នត្ថិ វិក្ខិត្តចេតសោ.

៥៤៨. ន ទោសុម្មត្តកាទីនំ, អាបត្តីហិបិ តីហិបិ;

សមុដ្ឋានាទយោ តុល្យា, បឋមន្តិមវត្ថុនា.

បឋមានិយតកថា.

៥៤៩. អនន្ធាពធិរោ វិញ្ញូ, ឥត្ថី វា បុរិសោបិ វា;

អន្តោទ្វាទសហត្ថដ្ឋោ, អនាបត្តិករោ សិយា.

៥៥០. អន្ធោ អពធិរោ វាបិ, ពធិរោ វាបិ ចក្ខុមា;

ន ករោតិ អនាបត្តិំ, តិសមុដ្ឋានមេវិទំ.

ទុតិយានិយតកថា.

ឥតិ វិនយវិនិច្ឆយេ អនិយតកថា និដ្ឋិតា.