សង្ឃាទិសេសកថា

៣២៥. មោចេតុកាមតាចិត្តំ, វាយាមោ សុក្កមោចនំ;

អញ្ញត្រ សុបិនន្តេន, ហោតិ សង្ឃាទិសេសតា.

៣២៦. បរេនុបក្កមាបេត្វា, អង្គជាតំ បនត្តនោ;

សុក្កំ យទិ វិមោចេតិ, គរុកំ តស្ស និទ្ទិសេ.

៣២៧. សញ្ចិច្ចុបក្កមន្តស្ស, អង្គជាតំ បនត្តនោ;

ថុល្លច្ចយំ សមុទ្ទិដ្ឋំ, សចេ សុក្កំ ន មុច្ចតិ.

៣២៨. សញ្ចិច្ចុបក្កមន្តស្ស, អាកាសេ កម្បនេនបិ;

ហោតិ ថុល្លច្ចយំ តស្ស, យទិ សុក្កំ ន មុច្ចតិ.

៣២៩. វត្ថិំ កីឡាយ បូរេត្វា, បស្សាវេតុំ ន វដ្ដតិ;

និមិត្តំ បន ហត្ថេន, កីឡាបេន្តស្ស ទុក្កដំ.

៣៣០. តិស្សន្នំ បន ឥត្ថីនំ, និមិត្តំ រត្តចេតសា;

បុរតោ បច្ឆតោ វាបិ, ឱលោកេន្តស្ស ទុក្កដំ.

៣៣១. ឯកេនេកំ បយោគេន, ទិវសម្បិ ច បស្សតោ;

នាបត្តិយា ភវេ អង្គំ, ឧម្មីលននិមីលនំ.

៣៣២. អមោចនាធិប្បាយស្ស, អនុបក្កមតោបិ ច;

សុបិនន្តេន មុត្តស្មិំ, អនាបត្តិ បកាសិតា.

សុក្កវិសដ្ឋិកថា.

៣៣៣. អាមសន្តោ មនុស្សិត្ថិំ, កាយសំសគ្គរាគតោ;

‘‘មនុស្សិត្ថី’’តិ សញ្ញាយ, ហោតិ សង្ឃាទិសេសិកោ.

៣៣៤. លោមេនន្តមសោ លោមំ, ផុសន្តស្សាបិ ឥត្ថិយា;

កាយសំសគ្គរាគេន, ហោតិ អាបត្តិ ភិក្ខុនោ.

៣៣៥. ឥត្ថិយា យទិ សម្ផុដ្ឋោ, ផស្សំ សេវនចេតនោ;

វាយមិត្វាធិវាសេតិ, ហោតិ សង្ឃាទិសេសតា.

៣៣៦. ឯកេន បន ហត្ថេន, គហេត្វា ទុតិយេន វា;

តត្ថ តត្ថ ផុសន្តស្ស, ឯកាវាបត្តិ ទីបិតា.

៣៣៧. អគ្គហេត្វា ផុសន្តស្ស, យាវ បាទញ្ច សីសតោ;

កាយា ហត្ថមមោចេត្វា, ឯកាវ ទិវសម្បិ ច.

៣៣៨. អង្គុលីនំ តុ បញ្ចន្នំ, គហណេ ឯកតោ បន;

ឯកាយេវ សិយាបត្តិ, ន ហិ កោដ្ឋាសតោ សិយា.

៣៣៩. នានិត្ថីនំ សចេ បញ្ច, គណ្ហាត្យង្គុលិយោ បន;

ឯកតោ បញ្ច សង្ឃាទិ-សេសា ហោន្តិស្ស ភិក្ខុនោ.

៣៤០. ឥត្ថិយា វិមតិស្សាបិ, បណ្ឌកាទិកសញ្ញិនោ;

កាយេន ឥត្ថិយា កាយ-សម្ពទ្ធំ ផុសតោបិ វា.

៣៤១. បណ្ឌកេ យក្ខិបេតីសុ, តស្ស ថុល្លច្ចយំ សិយា;

ទុក្កដំ កាយសំសគ្គេ, តិរច្ឆានគតិត្ថិយា.

៣៤២. ភិក្ខុនោ បដិពទ្ធេន, កាយេន បន ឥត្ថិយា;

កាយេន បដិពទ្ធញ្ច, ផុសន្តស្សបិ ទុក្កដំ.

៣៤៣. ឥត្ថីនំ ឥត្ថិរូបញ្ច, ទារុលោហមយាទិកំ;

តាសំ វត្ថមលង្ការំ, អាមសន្តស្ស ទុក្កដំ.

៣៤៤. តត្ថជាតផលំ ខជ្ជំ, មុគ្គាទិំ តត្ថជាតកំ;

ធញ្ញានិ បន សព្ពានិ, អាមសន្តស្ស ទុក្កដំ.

៣៤៥. សព្ពំ ធមនសង្ខាទិំ, បញ្ចង្គតុរិយម្បិ ច;

រតនានិ ច សព្ពានិ, អាមសន្តស្ស ទុក្កដំ.

៣៤៦. សព្ពមាវុធភណ្ឌញ្ច, ជិយា ច ធនុទណ្ឌកោ;

អនាមាសមិទំ សព្ពំ, ជាលញ្ច សរវារណំ.

៣៤៧. សុវណ្ណបដិពិម្ពាទិ, ចេតិយំ អារកូដកំ;

អនាមាសន្តិ និទ្ទិដ្ឋំ, កុរុន្ទដ្ឋកថាយ ហិ.

៣៤៨. សព្ពំ ឱនហិតុំ វាបិ, ឱនហាបេតុមេវ វា;

វាទាបេតុញ្ច វាទេតុំ, វាទិតំ ន ច វដ្ដតិ.

៣៤៩. ‘‘ករិស្សាមុបហារ’’ន្តិ, វុត្តេន បន ភិក្ខុនា;

បូជា ពុទ្ធស្ស កាតព្ពា, វត្តព្ពាតិ ច វិញ្ញុនា.

៣៥០. សយំ ផុសិយមានស្ស, ឥត្ថិយា បន ធុត្តិយា;

អវាយមិត្វា កាយេន, ផស្សំ បដិវិជានតោ.

៣៥១. អនាបត្តិ អសញ្ចិច្ច, អជានន្តស្ស ភិក្ខុនោ;

មោក្ខាធិប្បាយិនោ ចេវ, តថា ឧម្មត្តកាទិនោ.

៣៥២. បឋមេន សមានាវ, សមុដ្ឋានាទយោ បន;

កាយសំសគ្គរាគស្ស, តថា សុក្កវិសដ្ឋិយា.

កាយសំសគ្គកថា.

៣៥៣. ទុដ្ឋុល្លវាចស្សាទេន, ឥត្ថិយា ឥត្ថិសញ្ញិនោ;

ទ្វិន្នញ្ច បន មគ្គានំ, វណ្ណាវណ្ណវសេន ច.

៣៥៤. មេថុនយាចនាទីហិ, ឱភាសន្តស្ស ភិក្ខុនោ;

វិញ្ញុំ អន្តមសោ ហត្ថ-មុទ្ទាយបិ គរុំ សិយា.

៣៥៥. ‘‘សិខរណីសិ, សម្ភិន្នា, ឧភតោព្យញ្ជនា’’តិ ច;

អក្កោសវចនេនាបិ, គរុកំ តុ សុណន្តិយា.

៣៥៦. បុនប្បុនោភាសន្តស្ស, ឯកវាចាយ វា ពហូ;

គណនាយ ច វាចានំ, ឥត្ថីនំ គរុកា សិយុំ.

៣៥៧. សា ចេ នប្បដិជានាតិ, តស្ស ថុល្លច្ចយំ សិយា;

អាទិស្ស ភណនេ ចាបិ, ឧព្ភជាណុមធក្ខកំ.

៣៥៨. ឧព្ភក្ខកមធោជាណុ-មណ្ឌលំ បន ឧទ្ទិសំ;

វណ្ណាទិភណនេ កាយ-បដិពទ្ធេ ច ទុក្កដំ.

៣៥៩. ថុល្លច្ចយំ ភវេ តស្ស, បណ្ឌកេ យក្ខិបេតិសុ;

អធក្ខកោព្ភជាណុម្ហិ, ទុក្កដំ បណ្ឌកាទិសុ.

៣៦០. ឧព្ភក្ខកមធោជាណុ-មណ្ឌលេបិ អយំ នយោ;

សព្ពត្ថ ទុក្កដំ វុត្តំ, តិរច្ឆានគតិត្ថិយា.

៣៦១. អត្ថធម្មបុរេក្ខារំ, កត្វា ឱភាសតោបិ ច;

វទតោបិ អនាបត្តិ, បុរក្ខត្វានុសាសនិំ.

៣៦២. តថា ឧម្មត្តកាទីនំ, សមុដ្ឋានាទយោ នយា;

អទិន្នាទានតុល្យាវ, វេទនេត្ថ ទ្វិធា មតា.

ទុដ្ឋុល្លវាចាកថា.

៣៦៣. វណ្ណំ បនត្តនោ កាម-បារិចរិយាយ ភាសតោ;

តស្មិំយេវ ខណេ សា ចេ, ជានាតិ គរុកំ សិយា.

៣៦៤. នោ ចេ ជានាតិ សា យក្ខិ-បេតិទេវីសុ បណ្ឌកេ;

ហោតិ ថុល្លច្ចយំ តស្ស, សេសេ អាបត្តិ ទុក្កដំ.

៣៦៥. ចីវរាទីហិ អញ្ញេហិ, វត្ថុកាមេហិ អត្តនោ;

នត្ថិ ទោសោ ភណន្តស្ស, បារិចរិយាយ វណ្ណនំ.

៣៦៦. ឥត្ថិសញ្ញា មនុស្សិត្ថី, បារិចរិយាយ រាគិតា;

ឱភាសោ តេន រាគេន, ខណេ តស្មិំ វិជាននំ.

៣៦៧. បញ្ចង្គានិ ឥមានេត្ថ, វេទិតព្ពានិ វិញ្ញុនា;

សមុដ្ឋានាទយោប្យស្ស, អនន្តរសមា មតា.

អត្តកាមបារិចរិយកថា.

៣៦៨. បដិគ្គណ្ហាតិ សន្ទេសំ, បុរិសស្សិត្ថិយាបិ វា;

វីមំសតិ គរុ ហោតិ, បច្ចាហរតិ ចេ បន.

៣៦៩. ‘‘យស្សា ហិ សន្តិកំ គន្ត្វា, អារោចេហី’’តិ បេសិតោ;

តមទិស្វា តទញ្ញស្ស, អវស្សារោចកស្ស សោ.

៣៧០. ‘‘អារោចេហី’’តិ វត្វា តំ, បច្ចាហរតិ ចេ បន;

ភិក្ខុ សង្ឃាទិសេសម្ហា, សញ្ចរិត្តា ន មុច្ចតិ.

៣៧១. ‘‘មាតរា រក្ខិតំ ឥត្ថិំ, គច្ឆ ព្រូហី’’តិ បេសិតោ;

បិតុរក្ខិតមញ្ញំ វា, វិសង្កេតោវ ភាសតោ.

៣៧២. បដិគ្គណ្ហនតាទីហិ, តីហិ អង្គេហិ សំយុតេ;

សញ្ចរិត្តេ សមាបន្នេ, គរុកាបត្តិមាទិសេ.

៣៧៣. ទ្វីហិ ថុល្លច្ចយំ វុត្តំ, បណ្ឌកាទីសុ តីហិបិ;

ឯកេនេវ ច សព្ពត្ថ, ហោតិ អាបត្តិ ទុក្កដំ.

៣៧៤. ចេតិយស្ស ច សង្ឃស្ស, គិលានស្ស ច ភិក្ខុនោ;

គច្ឆតោ បន កិច្ចេន, អនាបត្តិ បកាសិតា.

៣៧៥. មនុស្សត្តំ តថា តស្សា, ននាលំវចនីយតា;

បដិគ្គណ្ហនតាទីនំ, វសា បញ្ចង្គិកំ មតំ.

៣៧៦. ឥទញ្ហិ ឆសមុដ្ឋានំ, អចិត្តកមុទីរិតំ;

អលំវចនីយត្តំ វា, បណ្ណត្តិំ វា អជានតោ.

៣៧៧. គហេត្វា សាសនំ កាយ-វិការេនូបគម្ម តំ;

វីមំសិត្វា ហរន្តស្ស, គរុកំ កាយតោ សិយា.

៣៧៨. សុត្វា យថានិសិន្នោវ, វចនំ ឥត្ថិយា បុន;

តំ តត្ថេវាគតស្សេវ, អារោចេន្តស្ស វាចតោ.

៣៧៩. អជានន្តស្ស បណ្ណត្តិំ, កាយវាចាហិ តំ វិធិំ;

ករោតោ ហរតោ វាបិ, គរុកំ កាយវាចតោ.

៣៨០. ជានិត្វាបិ ករោន្តស្ស, គរុកាបត្តិយោ តថា;

សចិត្តកេហិ តីហេវ, សមុដ្ឋានេហិ ជាយរេ.

សញ្ចរិត្តកថា.

៣៨១. សយំយាចិតកេហេវ, កុដិកំ អប្បមាណិកំ;

អត្តុទ្ទេសំ ករោន្តស្ស, តថាទេសិតវត្ថុកំ.

៣៨២. ហោន្តិ សង្ឃាទិសេសា ទ្វេ, សារម្ភាទីសុ ទុក្កដំ;

សចេ ឯកវិបន្នា សា, គរុកំ ឯកកំ សិយា.

៣៨៣. បុរិសំ យាចិតុំ កម្ម-សហាយត្ថាយ វដ្ដតិ;

មូលច្ឆេជ្ជវសេនេវ, យាចមានស្ស ទុក្កដំ.

៣៨៤. អវជ្ជំ ហត្ថកម្មម្បិ, យាចិតុំ បន វដ្ដតិ;

ហត្ថកម្មម្បិ នាមេតំ, កិញ្ចិ វត្ថុ ន ហោតិ ហិ.

៣៨៥. គោណមាយាចមានស្ស, ឋបេត្វា ញាតកាទិកេ;

ទុក្កដំ តស្ស និទ្ទិដ្ឋំ, មូលច្ឆេជ្ជេន តេសុបិ.

៣៨៦. ‘‘គោណំ ទេមា’’តិ វុត្តេបិ, គហេតុំ ន ច វដ្ដតិ;

សកដំ ទារុភណ្ឌត្តា, គហេតុំ បន វដ្ដតិ.

៣៨៧. វាសិផរសុកុទ្ទាល-កុឋារាទីស្វយំ នយោ;

អនជ្ឈាវុត្ថកំ សព្ពំ, ហរាបេតុម្បិ វដ្ដតិ.

៣៨៨. វល្លិអាទិម្ហិ សព្ពស្មិំ, គរុភណ្ឌប្បហោនកេ;

បរេសំ សន្តកេយេវ, ហោតិ អាបត្តិ ទុក្កដំ.

៣៨៩. បច្ចយេសុ ហិ តីស្វេវ, វិញ្ញត្តិ ន ច វដ្ដតិ;

តតិយេ បរិកថោភាស-និមិត្តានិ ច លព្ភរេ.

៣៩០. ‘‘អទេសិតេ ច វត្ថុស្មិំ, បមាណេនាធិកំ កុដិំ;

ករិស្សាមី’’តិ ចិន្តេត្វា, អរញ្ញំ គច្ឆតោបិ ច.

៣៩១. ផរសុំ វាបិ វាសិំ វា, និសេន្តស្សាបិ ទុក្កដំ;

ឆិន្ទតោ ទុក្កដំ រុក្ខំ, តស្ស បាចិត្តិយា សហ.

៣៩២. ឯវំ បុព្ពបយោគស្មិំ, កុដិការកភិក្ខុនោ;

យថាបយោគមាបត្តិំ, វិនយញ្ញូ វិនិទ្ទិសេ.

៣៩៣. យា បន ទ្វីហិ បិណ្ឌេហិ, និដ្ឋានំ តុ គមិស្សតិ;

ហោតិ ថុល្លច្ចយំ តេសុ, បឋមេ ទុតិយេ គរុ.

៣៩៤. អនាបត្តិ សចញ្ញស្ស, ទេតិ វិប្បកតំ កុដិំ;

តថា ភូមិំ សមំ កត្វា, ភិន្ទតោបិ ច តំ កុដិំ.

៣៩៥. គុហំ លេណំ ករោន្តស្ស, តិណបណ្ណច្ឆទម្បិ វា;

វាសាគារំ ឋបេត្វាន, អញ្ញស្សត្ថាយ វា តថា.

៣៩៦. ទេសាបេត្វាវ ភិក្ខូហិ, វត្ថុំ បន ច ភិក្ខុនោ;

ក្រិយតោវ សមុដ្ឋាតិ, ករោតោ អប្បមាណិកំ.