អមនុស្សិកាពាធកថា

អមនុស្សិកាពាធកថាយំ ‘‘អនុជានាមិ, ភិក្ខវេ, អមនុស្សិកាពាធេ អាមកមំសំ អាមកមំសលោហិត’’ន្តិ (មហាវ. ២៦៤) វចនតោ យស្ស ភិក្ខុនោ អាមកមំសំ ខាទិតស្ស អាមកលោហិតំ បិវិតស្ស សោ អមនុស្សាពាធោ បដិប្បស្សម្ភតិ, តស្ស អនាបត្តិ. តត្ថ អាមកមំសញ្ច ខាទិ, អាមកលោហិតញ្ច បិវីតិ ន តំ ភិក្ខុ ខាទិ, ន បិវិ, អមនុស្សោ ខាទិត្វា ច បិវិត្វា ច បក្កន្តោ. តេន វុត្តំ ‘‘តស្ស សោ អមនុស្សិកាពាធោ បដិប្បស្សម្ភី’’តិ.