បាថេយ្យកថា

៦៦. បាថេយ្យកថាយំ ‘‘អនុជានាមិ, ភិក្ខវេ’’តិអាទិ ភទ្ទិយនគរេ អមិតបរិភោគភូតេន មេណ្ឌកសេដ្ឋិនា អភិយាចិតោ ហុត្វា អនុញ្ញាតំ, ឥធ បន បឋមំ ‘‘អនុជានាមិ, ភិក្ខវេ, បញ្ច គោរសេ ខីរំ ទធិំ តក្កំ នវនីតំ សប្បិ’’ន្តិ (មហាវ. ២៩៩) បញ្ច គោរសា អនុញ្ញាតា. តតោ បរំ សេដ្ឋិនោ អភិយាចនានុរូបំ វត្វា អនុជានិតុំ ‘‘សន្តិ, ភិក្ខវេ, មគ្គា កន្តារា’’តិអាទិមាហ. សេសំ អដ្ឋកថាយំ វុត្តនយេនេវ វេទិតព្ពំ. តថា អលភន្តេន អញ្ញាតកអប្បវារិតដ្ឋានតោ យាចិត្វាបិ គហេតព្ពន្តិ ឯតេន ឯវរូបេសុ កាលេសុ វិញ្ញត្តិបច្ចយា ទោសោ នត្ថីតិ ទស្សេតិ. ‘‘ឯកទិវសេន គមនីយេ មគ្គេ ឯកភត្តត្ថាយ បរិយេសិតព្ព’’ន្តិ វុត្តត្តា បន តតោ ឧបរិ យាចនំ ន វដ្ដតីតិ ទស្សិតំ. ‘‘ទីឃេ អទ្ធានេ’’តិអាទិនា សចេ មាសគមនីយេ មគ្គេ សត្តាហគមនីយោ ឯវ កន្តារោ ហោតិ, តត្ថ សត្តាហយាបនីយមត្តមេវ បាថេយ្យំ បរិយេសិតព្ពំ, តតោ បរំ បិណ្ឌចារិកាទិវសេន សុភិក្ខសុលភបិណ្ឌមគ្គត្តា ន បរិយេសិតព្ពន្តិ.