នហាបិតបុព្ពកថា

៦៤. នហាបិតបុព្ពកថាយំ នហាបិតោ បុព្ពេតិ នហាបិតបុព្ពោ, បុព្ពេ នហាបិតោ ហុត្វា ឥទានិ ភិក្ខុភូតោតិ អត្ថោ. តេន នហាបិតបុព្ពេន ភិក្ខុនា. ខុរភណ្ឌន្តិ ខុរាទិនហាបិតភណ្ឌំ, ‘‘លទ្ធាតបត្តោ រាជកុមារោ’’តិអាទីសុ វិយ ឧបលក្ខណនយោយំ. ‘‘ន, ភិក្ខវេ, បព្ពជិតេន អកប្បិយំ សមាទបេតព្ពំ, យោ សមាទបេយ្យ, អាបត្តិ ទុក្កដស្ស. ន ច, ភិក្ខវេ, នហាបិតបុព្ពេន ខុរភណ្ឌំ បរិហរិតព្ពំ, យោ បរិហរេយ្យ, អាបត្តិ ទុក្កដស្សា’’តិ (មហាវ. ៣០៣) ច ទ្វិធា បញ្ញត្តិ, តស្មា នហាបិតបុព្ពេន វា អនហាបិតបុព្ពេន វា បព្ពជិតេន នាម អកប្បិយសមាទបនំ ន កាតព្ពំ. នហាបិតបុព្ពេន បន ភិក្ខុនា ខុរេន អភិលក្ខិតំ ខុរភណ្ឌំ, ខុរភណ្ឌខុរកោសនិសិតបាសាណខុរថវិកាទយោ ន បរិហរិតព្ពា ឯវ. សេសំ អដ្ឋកថាយំ វុត្តនយេនេវ វេទិតព្ពំ. វជិរពុទ្ធិដីកាយំ (វជិរ. ដី. មហាវគ្គ ៣០០) បន ‘‘ន, ភិក្ខវេ, បព្ពជិតេន អកប្បិយេ សមាទបេតព្ពន្តិ វុត្តត្តា អនុបសម្បន្នស្សបិ ន កេវលំ ទសសុ ឯវ សិក្ខាបទេសុ, អថ ខោ យំ ភិក្ខុស្ស ន កប្បតិ, តស្មិម្បីតិ អធិប្បាយោ’’តិ វុត្តំ.