ឆន្ទារោបនកថា

៤៦. ឆន្ទារោបនកថាយំ ឆន្ទសោតិ សក្កដភាសាយ. ន អារោបេតព្ពន្តិ វាចនាមគ្គំ ន អារោបេតព្ពំ. សកាយ និរុត្តិយាតិ មាគធភាសាយ. តត្ថ សន្តេហិ កតាតិ សក្កដា, អដ្ឋកវាមកាទីហិ សមិតបាបេហិ ឥសីហិ កតាតិ អត្ថោ. អថ វា សក្ករិតព្ពា បូជិតព្ពាតិ សក្កដា មនុស្សានំ ហិតសុខាវហនតោ, តទត្ថិកេហិ មនុស្សេហិ បូជិតព្ពាតិ អត្ថោ. ភាសីយតេតិ ភាសា, សក្កដា ច សា ភាសា ចាតិ សក្កដភាសា. វេទត្តយគតា និរុត្តិ, សស្ស ឯសាតិ សកា, ភគវតោ វចនន្ត្យត្ថោ. មគធេ ជាតា មាគធិកា, អាទិកប្បកាលេ មគធរដ្ឋេ ជាតាតិ អត្ថោ. ឧច្ចតេតិ ឧត្តិ, នីហរិត្វា ឧត្តិ និរុត្តិ, បិដកត្តយតោ នីហរិត្វា កថីយតេត្យត្ថោ. វុត្តញ្ហេតំ បោរាណេហិ –

‘‘សា មាគធី មូលភាសា;

នរា យាយាទិកប្បិកា;

ព្រហ្មានោ ចាស្សុតាលាបា;

សម្ពុទ្ធា ចាបិ ភាសរេ’’តិ.

សេសំ សុវិញ្ញេយ្យមេវ.