តតោនីហដកថា

តតោ នីហដកថាយំ ‘‘បដិគ្គណ្ហថ, ភិក្ខវេ, បរិភុញ្ជថ. អនុជានាមិ, ភិក្ខវេ, តតោ នីហដំ ភុត្តាវិនា បវារិតេន អនតិរិត្តំ បរិភុញ្ជិតុ’’ន្តិ (មហាវ. ២៧៦) វចនតោ យស្មិំ ទានេ និមន្តិតា ហុត្វា ភិក្ខូ ភុញ្ជន្តិ, តតោ ទានតោ នីហដំ ភោជនំ បវារិតេន ភិក្ខុនា ភុញ្ជិតព្ពំ, ន បវារិតសិក្ខាបទេន អាបត្តិ ហោតិ. វុត្តញ្ហិ អដ្ឋកថាយំ (មហាវ. អដ្ឋ. ២៧៦) ‘‘តតោ នីហដន្តិ យត្ថ និមន្តិតា ភុញ្ជន្តិ, តតោ នីហដ’’ន្តិ.