ទុដ្ឋគហណិកកថា

ទុដ្ឋគហណិកកថាយំ ‘‘អនុជានាមិ, ភិក្ខវេ, អាមិសខារំ បាយេតុ’’ន្តិ (មហាវ. ២៦៩) វចនតោ ទុដ្ឋគហណិកស្ស ភិក្ខុនោ អាមិសខារំ បាយេតុំ វដ្ដតិ. តត្ថ ទុដ្ឋគហណិកោតិ វិបន្នគហណិកោ, កិច្ឆេន ឧច្ចារោ និក្ខមតីតិ អត្ថោ. អាមិសខារន្តិ សុក្ខោទនំ ឈាបេត្វា តាយ ឆារិកាយ បគ្ឃរិតំ ខារោទកំ. វិមតិវិនោទនិយំ (វិ. វិ. ដី. មហាវគ្គ ២.២៦៧-២៦៩) បន ‘‘តាយ ឆារិកាយ បគ្ឃរិតំ ខារោទកន្តិ បរិស្សាវនេ តំ ឆារិកំ បក្ខិបិត្វា ឧទកេ អភិសិញ្ចិតេ តតោ ឆារិកតោ ហេដ្ឋា បគ្ឃរិតំ ខារោទក’’ន្តិ វុត្តំ.