ចោទនាកណ្ឌំ

អនុវិជ្ជកកិច្ចវណ្ណនា

៣៦០. បាឡិយំ យំ ខោ ត្វន្តិអាទីសុ ត្វំ, អាវុសោ, យំ ឥមំ ភិក្ខុំ ចោទេសិ, តំ កិម្ហិ ទោសេ ចោទេសិ, កតរាយ វិបត្តិយា ចោទេសីតិ អត្ថោ. ឯវំ សព្ពត្ថ.

៣៦១. អសុទ្ធបរិសង្កិតោតិ អសុទ្ធាយ អដ្ឋានេ ឧប្បន្នាយ បរិសង្កាយ បរិសង្កិតោ. តេនាហ ‘‘អមូលកបរិសង្កិតោ’’តិ.

៣៦៤. បាឡិយំ ឧបោសថោ សាមគ្គត្ថាយាតិ វិសុទ្ធានំ ភិក្ខូនំ អញ្ញោញ្ញនិរបេក្ខោ អហុត្វា ឧបោសថោ ឧបោសថដ្ឋានំ សន្និបតិត្វា ‘‘បារិសុទ្ធិំ អាយស្មន្តោ អារោចេថ, បរិសុទ្ធេត្ថាយស្មន្តោ, បរិសុទ្ធោ អហំ អាវុសោ’’តិអាទិនា អញ្ញមញ្ញំ បរិសុទ្ធិវីមំសនារោចនវសេន អយុត្តេ វិវជ្ជេត្វា យុត្តេហេវ កាយចិត្តសាមគ្គីករណត្ថាយ.

វិសុទ្ធាយ បវារណាតិ ទិដ្ឋសុតាទីហិ អញ្ញមញ្ញំ កថាបេត្វា វិសុទ្ធិសម្បាទនត្ថាយាតិ អត្ថោ. ឧភោ ឯតេតិ អាមិសបុគ្គលនិស្សយនេ ឯតេ ឧភោ.

អនុវិជ្ជកកិច្ចវណ្ណនា និដ្ឋិតា.