ភិក្ខុនីឧបសម្បទានុជាននកថាវណ្ណនា

៤០៤-៨. បាឡិយំ យទគ្គេនាតិ យស្មិំ ទិវសេ. តទាតិ តស្មិំយេវ ទិវសេ. វិមានេត្វាតិ អវមានំ កត្វា.

៤១០-១. អាបត្តិគាមិនិយោតិ អាបត្តិំ អាបន្នាយោ. កម្មវិភង្គេតិ បរិវារេ កម្មវិភង្គេ (បរិ. ៤៨២ អាទយោ).

៤១៣-៥. បាឡិយំ ទ្វេ តិស្សោ ភិក្ខុនិយោតិ ទ្វីហិ តីហិ ភិក្ខុនីហិ. ន អារោចេន្តីតិ បាតិមោក្ខុទ្ទេសកស្ស ន អារោចេន្តិ.

៤១៦. ទុស្សវេណិយាតិ អនេកទុស្សបដ្ដេ ឯកតោ កត្វា កតវេណិយា.

៤១៧. វិសេសកន្តិ បត្តលេខាទិវណ្ណវិសេសំ. បកិណន្តីតិ វិក្កិណន្តិ. នមនកន្តិ បាសុកដ្ឋិនមនកពន្ធនំ.

៤២២-៥. សំវេល្លិយន្តិ កច្ឆំ ពន្ធិត្វា និវាសនំ. តយោ និស្សយេតិ រុក្ខមូលសេនាសនស្ស តាសំ អលព្ភនតោ វុត្តំ.

៤២៦-៨. អដ្ឋេវ ភិក្ខុនិយោ យថាវុឌ្ឍំ បដិពាហន្តីតិ អដ្ឋ ភិក្ខុនិយោ វុឌ្ឍបដិបាដិយាវ គណ្ហន្តិយោ អាគតបដិបាដិំ បដិពាហន្តិ, នាញ្ញាតិ អត្ថោ. អនុវាទំ បដ្ឋបេន្តីតិ ឥស្សរិយំ បវត្តេន្តីតិ អត្ថំ វទន្តិ.

៤៣០. ភិក្ខុទូតេនាតិ ភិក្ខុនា ទូតភូតេន. សិក្ខមានទូតេនាតិ សិក្ខមានាយ ទូតាយ.

៤៣១. ន សម្មតីតិ នប្បហោតិ. នវកម្មន្តិ ‘‘នវកម្មំ កត្វា វសតូ’’តិ អបលោកេត្វា សង្ឃិកភូមិយា ឱកាសទានំ.

៤៣២-៦. សន្និសិន្នគព្ភាតិ ទុវិញ្ញេយ្យគព្ភា. មហិលាតិត្ថេតិ ឥត្ថីនំ សាធារណតិត្ថេ.

ភិក្ខុនីឧបសម្បទានុជាននកថាវណ្ណនា និដ្ឋិតា.

ភិក្ខុនិក្ខន្ធកវណ្ណនានយោ និដ្ឋិតោ.