៣. សភោជនសិក្ខាបទវណ្ណនា

២៨១. តតិយេ បាឡិយំ ខុទ្ទកេ ឃរេតិ ឯត្ថ ខុទ្ទកំ ឃរំ នាម បញ្ចហត្ថតោ ឩនកវិត្ថារំ អធិប្បេតំ. តត្ថ ច បិដ្ឋសង្ឃាដតោ ហត្ថបាសេ អវិជហិតេបិ បិដ្ឋិវំសាតិក្កមោ ហោតីតិ អាហ ‘‘បិដ្ឋិវំសំ អតិក្កមិត្វា’’តិ. យថា តថា វា កតស្សាតិ បិដ្ឋិវំសំ អារោបេត្វា វា អនារោបេត្វា វា កតស្ស.

២៨៣. បាឡិយំ វីតរាគាតិ អបរិយុដ្ឋិតរាគានំ, អនាគាមីនញ្ច សង្គហោ. សចិត្តកន្តិ អនុបវិសិត្វា និសីទនចិត្តេន សចិត្តកំ. បរិយុដ្ឋិតរាគជាយម្បតិកានំ សន្និហិតតា, សយនិឃរតា, ទុតិយស្ស ភិក្ខុនោ អភាវោ, អនុបខជ្ជ និសីទនន្តិ ឥមានេត្ថ ចត្តារិ អង្គានិ.

សភោជនសិក្ខាបទវណ្ណនា និដ្ឋិតា.

២៨៤-២៨៩. ចតុត្ថបញ្ចមានិ វុត្តត្ថានិ.