២. ទុតិយសិក្ខាបទវណ្ណនា

១០៣០. ភិក្ខុនី ចេ ភិក្ខុំ អក្កោសតិ, ឥមិនា សិក្ខាបទេន បាចិត្តិយំ. ភិក្ខុនិំ ចេ អក្កោសតិ, ឱមសវាទេន អាបជ្ជតិ. ឱមសវាទេ សម្មុខាវ រុហតិ, ឥធ បន បរម្មុខាបិ.

តត្រាយំ វិចារណា – ភិក្ខុវិភង្គេ ឱសមវាទសិក្ខាបទេ ភិក្ខុនី អនុបសម្បន្នដ្ឋានេ តិដ្ឋតីតិ កត្វា ភិក្ខុនិវិភង្គេបិ ឱមសវាទសិក្ខាបទេ ភិក្ខុ ភិក្ខុនិយា អនុបសម្បន្នដ្ឋានេ តិដ្ឋតីតិ សិទ្ធំ. ឥធ ច អនុបសម្បន្នស្ស អក្កោសនេ ទុក្កដំ វុត្តំ, ភិក្ខុស្ស ឧបសម្បន្នស្ស អក្កោសនេ បាចិត្តិយំ វុត្តំ, តស្មា ឥមានិ ទ្វេ សិក្ខាបទានិ ភិក្ខុម្ហិ សំសន្ទិយមានានិ អញ្ញមញ្ញំ ន សមេន្តិ. យថា សមេន្តិ, តថា ជានិតព្ពំ. តត្ថ បោរាណគណ្ឋិបទេ វុត្តនយេន ភិក្ខុនីនំ ឱមសវាទសិក្ខាបទេ អនុបសម្បន្នោតិ ន គហេតព្ពោ, ឥទមេត្ថ យុត្តំ. បរិភាសេយ្យាតិ អញ្ញត្រ អក្កោសវត្ថូហិ. តេសុ ហិ អញ្ញតរស្មិំ សតិ ឱមសវាទបាចិត្តិយមេវាតិ ឯកេ, តំ ន យុត្តំ. ឱមសវាទេ បាឡិមុត្តកអក្កោសេ ហិ ទុក្កដំ ហោតីតិ. ទុក្កដោកាសេ ឥទំ បាចិត្តិយំ តេហិ និទ្ទិដ្ឋំ ហោតិ, តស្មា ‘‘ពាលា ឯតា’’តិ បាឡិយំ ឥធ អាគតបទានំយេវ វសេន បរិភាសនំ វេទិតព្ពំ.

ទុតិយសិក្ខាបទវណ្ណនា និដ្ឋិតា.

១០៣៣. តតិយសិក្ខាបទំ ឧត្តានត្ថមេវ.