៤. មោគ្គល្លានសុត្តវណ្ណនា

៨២៦. ឧទ្ធច្ចបកតិកាតិ វិក្ខិត្តសភាវា, វិព្ភន្តចិត្តាតិ អត្ថោ. អនវដ្ឋិតតាយ វិប្ផន្ទិតចិត្តតាយ វិប្ផន្ទមានចិត្តា. តុច្ឆតាយ នឡោ វិយាតិ នឡោ, មានោ, ឧគ្គតោ នឡោ ឯតេសន្តិ ឧន្នឡាតិ អាហ – ‘‘ឧន្នឡាតិ…បេ… វុត្តំ ហោតី’’តិ. ចបលាតិ ចាបល្យតា នាម លោលភាវោ. មុរាតិ ខរវចនា, ផរុសវចនាតិ អត្ថោ. វិកិណ្ណវាចា នាម សម្ផប្បលាបិនោតិ វុត្តំ ‘‘អសំយតវចនា’’តិអាទិ. បដិបត្តិធម្មេ បមុដ្ឋា វិនដ្ឋា បដិវិនដ្ឋា សតិ ឯតេសន្តិ មុដ្ឋសតីតិ អាហ – ‘‘នដ្ឋស្សតិនោ’’តិ. ឧព្ភន្តចិត្តាតិ សមាធិនោ អភាវេន ឧទ្ធច្ចេនេវ ឧបរូបរិ ភន្តចិត្តា. បាកតិន្ទ្រិយា អភាវិតកាយតាយ គាមទារកា វិយ បកតិភូតឥន្ទ្រិយា. នេមោ វុច្ចតិ ភូមិយា ពទ្ធភាវនិមិត្តបទេសោ, គម្ភីរោ នេមោ ឯតស្សាតិ គម្ភីរនេមោ. សុដ្ឋុ និខាតោតិអាទិ តស្ស បាទស្ស សុប្បតិដ្ឋិតភាវទស្សនំ.