៩. កដ្ឋោបមសុត្តវណ្ណនា

៥០៩. ទ្វិន្នំ អរណីនន្តិ អធរុត្តរារណីនំ. កិញ្ចិ ទ្វយំ សង្ឃដ្ដិតមត្តំ ហុត្វា ន សមោធានគតំ ហោតីតិ តំនិវត្តនត្ថំ ‘‘សង្ឃដ្ដនសមោធានា’’តិ វុត្តំ. បុនប្បុនំ សង្ឃដ្ដនេន ហិ តេជោបាតុភាវោ. អធរារណី វិយ វត្ថារម្មណំ អសតិបិ វាយាមេ តជ្ជសម្ផស្សបច្ចយតោ. ឧត្តរារណី វិយ ផស្សោ វត្ថារម្មណាទិផស្សេន បវត្តនតោ. សង្ឃដ្ដោ វិយ ផស្សសង្ឃដ្ដនំ អរណិទ្វយសង្ឃដ្ដនា វិយ ផស្សស្សេវ វត្ថារម្មណេសុ សង្ឃដ្ដនាការេន បវត្តិតោ. អគ្គិ វិយ វេទនា អនុទហនដ្ឋេន ខណិកាវាយញ្ច. វត្ថារម្មណំ វា ឧត្តរារណី វិយ ឥន្ធនាបាតគហណាទីសុ ឧស្សាហស្ស វិយ បវត្តិសម្ភវតោ. ផស្សោ អធរារណី វិយ និរុស្សាហនិរីហតាវសេន អត្តសាធនតោ.