៣. អញ្ញិន្ទ្រិយសុត្តវណ្ណនា

៤៩៣. អជានិតបុព្ពំ ធម្មន្តិ ចតុសច្ចធម្មមាហ, តថា តេសំយេវ ញាតធម្មានន្តិ. អយំ បនេត្ថ អត្ថោ – អាជានាតីតិ អញ្ញា, បឋមមគ្គេន ញាតមនតិក្កមិត្វា ជានាតីតិ អត្ថោ. សោតាបន្នាទីនំ ឆអរិយានំ ឯតំ នាមំ. អញ្ញស្ស ឥន្ទ្រិយានិ អញ្ញិន្ទ្រិយានិ. អញ្ញាតាវីសូតិ អាជានិតវន្តេសុ. យស្មា អគ្គផលធម្មេសុ ញាណកិច្ចំ សាតិសយំ, តស្មា តំ កិច្ចំ សេសធម្មេសុបិ សមារោបេត្វា វុត្តំ ‘‘អញ្ញាតាវីសុ អរហត្តផលធម្មេសូ’’តិ. តត្ថ តត្ថ តេសុ តេសុ មគ្គផលេសុ. តេន តេនាការេនាតិ អនញ្ញាតជាននាទិអាការេន.