៨. ពីជគាមសុត្តវណ្ណនា

១១៤៨. ‘‘មូលពីជ’’ន្តិអាទីសុ មូលមេវ ពីជន្តិ មូលពីជំ, មូលពីជំ ឯតស្សាតិបិ មូលពីជំ. តត្ថ បុរិមេន ពីជគាមោ វុត្តោ ‘‘ពីជានំ សមូហោ’’តិ កត្វា, ទុតិយេន ភូតគាមោ. ទុវិធោបេសោ សាមញ្ញនិទ្ទេសេន, ‘‘មូលពីជញ្ច មូលពីជញ្ច មូលពីជ’’ន្តិ ឯកសេសនយេន វា ពីជត្ថោ វេទិតព្ពោ. ឯស នយោ សេសេសុបិ. ផឡុពីជន្តិ បព្ពពីជំ. ពាហិរបច្ចយន្តរសមវាយេ សទិសផលុប្បត្តិយា វិសេសការណភាវតោ វិរុហនសមត្ថេ សារផលេ និរុឡ្ហោ ពីជ-សទ្ទោ. តទត្ថសិទ្ធិយា មូលាទីសុបិ កេសុចិ បវត្តតីតិ តតោ និវត្តនត្ថំ ឯកេន ពីជ-សទ្ទេន វិសេសេត្វា វុត្តំ ‘‘ពីជពីជ’’ន្តិ ‘‘រូបរូបំ, ទុក្ខទុក្ខ’’ន្តិ (សំ. និ. ៤.៣២៧) ច យថា. នីលតិណរុក្ខាទិកស្សាតិ អល្លតិណស្ស ចេវ អល្លរុក្ខាទិកស្ស ច. អាទិ-សទ្ទេន ឱសធិគច្ឆលតាទីនំ គហណំ.