៨. វស្សសុត្តវណ្ណនា

១០៣៤. បារំ វុច្ចតិ និព្ពានំ សំសារមហោឃស្ស បរតីរភាវតោ. តេនាហ – ‘‘តិណ្ណោ បារង្គតោ, ថលេ តិដ្ឋតិ ព្រាហ្មណោ (សំ. និ. ៤.២៣៨; ឥតិវុ. ៦៩; បុ. ប. ១៨៨), យេ ជនា បារគាមិនោ’’តិ (ធ. ប. ៨៥) ច. អថ វា បាតិ រក្ខតីតិ បារំ, និព្ពានំ. យោ បដិវិជ្ឈតិ, តំ វដ្ដទុក្ខតោ បាតិ រក្ខតិ, អច្ចន្តហិតេន ច វិមុត្តិសុខេន ច រមេតិ, តស្មា បារន្តិ វុច្ចតិ. គច្ឆមានា ឯវាតិ បារំ និព្ពានំ គច្ឆមានា ឯវ. តេ ធម្មា អាសវានំ ខយាយ សំវត្តន្តិ សច្ឆិកិរិយាបហានបដិវេធានំ សមកាលត្តា.