៤. បឋមសរណានិសក្កសុត្តវណ្ណនា

១០២០. បមាណេនាតិ ឯកេន បមាណេន, ន សព្ពសោ. ឱលោកនំ ខមន្តីតិ ទស្សនមគ្គេន ចតុសច្ចធម្មា បច្ចត្តំ បស្សិតព្ពា បដិវិជ្ឈិតព្ពា. បឋមមគ្គក្ខណេ ហិ ចតុសច្ចធម្មា ឯកទេសតោវ ទិដ្ឋា នាម ហោន្តិ. ‘‘បរិមុច្ចតី’’តិ បន វត្តុំ វដ្ដតិ បដិវិជ្ឈនកិរិយាយ វត្តមានត្តា. អគន្ត្វា អបាយេសុ អនុប្បត្តិរហត្តា. តេនាហ ‘‘ន គច្ឆតី’’តិ, ន ឧប្បជ្ជតីតិ អត្ថោ. មហាសាររុក្ខេ ទស្សេន្តោ អាហ – ‘‘យោ កោចិ វិញ្ញុជាតិកោ មម ចេ គោចរំ គច្ឆតិ, ឯកស្ស អាគមនំ អវញ្ឈំ អមោឃ’’ន្តិ ទស្សេតុំ.