៦. បឋមមិត្តាមច្ចសុត្តវណ្ណនា

១០១២. វោហារមិត្តាតិ តំតំទានគ្គហណវសេន វោហារកា មិត្តា. អាមន្តនបដិមន្តនឥរិយាបថាទីសុបីតិ អាលាបសល្លាបគមននិសជ្ជាទិអត្ថសំវិធានាទីសុ. ឯកតោ បវត្តកិច្ចាតិ សហ បវត្តកត្តព្ពា. អមា សហ ភវន្តីតិ អមច្ចា. ‘‘អម្ហាកំ ឥមេ’’តិ ញាយន្តីតិ ញាតី, អាវាហវិវាហសម្ពទ្ធា. តេនាហ ‘‘សស្សុសសុរបក្ខិកា’’តិ. យោនិសម្ពន្ធា វា សាលោហិតា. តេនាហ ‘‘ភាតិភគិនិមាតុលាទយោ’’តិ.