៦. អរិដ្ឋសុត្តវណ្ណនា

៩៨២. នោ-សទ្ទោ បុច្ឆាយំ, តស្មា នូតិ ឥមិនា សមានត្ថោតិ អាហ ‘‘ភាវេថ នូ’’តិ. កាមច្ឆន្ទោតិ វត្ថុកាមេសុ ឥច្ឆាតិ អាហ ‘‘បញ្ចកាមគុណិករាគោ’’តិ. ទ្វាទសសុ អាយតនធម្មេសុ សបរសន្តតិបរិយាបន្នេសុ. ឥមិនា កាមច្ឆន្ទប្បហានកិត្តនេន បដិឃសញ្ញាបដិវិនយកិត្តនេន ច អនាគាមិមគ្គំ កថេតិ បញ្ចោរម្ភាគិយសញ្ញោជនសមុច្ឆេទស្ស ព្យាកតត្តា. វិបស្សនំ ទស្សេន្តោតិ ‘‘វិបស្សនំ អនុយុញ្ជថា’’តិ ទស្សេន្តោ.