៥. បឋមកាមភូសុត្តវណ្ណនា

៣៤៧. ឯលំ វុច្ចតិ ទោសោ, តំ ឯតស្ស នត្ថីតិ នេលំ, តំ អង្គំ ឯតស្សាតិ នេលង្គោ, សុវិសុទ្ធសីលគុណោ. តេនាហ ‘‘នេលង្គន្តិ ខោ, ភន្តេ, សីលានមេតំ អធិវចន’’ន្តិ. អដ្ឋកថាយំ បន ទោសាភាវមេវ ទស្សេតុំ ‘‘នេលង្គោតិ និទ្ទោសោ’’តិ វុត្តំ. ឯតំ ភិក្ខុំ អាគច្ឆន្តន្តិ មហាកប្បិនត្ថេរំ សន្ធាយ វុត្តំ. អត្តនោ ទិដ្ឋេន កថេសីតិ អត្តនោ សព្ពញ្ញុតញ្ញាណេន បច្ចក្ខតោ ឧបលក្ខិតេន អត្ថេន កថេសិ. អយំ បន នយគ្គាហេនាតិ អយំ បន គហបតិ អសុត្វា កេវលំ នយគ្គាហេន អាហ.

បឋមកាមភូសុត្តវណ្ណនា និដ្ឋិតា.