៩. បឋមសមុគ្ឃាតសប្បាយសុត្តវណ្ណនា

៣១. ឧបការភូតា តទាវហត្តា. តតោតិ មញ្ញិតាការតោ. តន្តិ មញ្ញនាវត្ថុំ. អញ្ញេនាការេនាតិ យថា មញ្ញតិ អនិច្ចាទិអាការតោ, អញ្ញេន អនិច្ចាទិនា អាការេន ហោតិ. អញ្ញថាភាវំ វិបរិណាមន្តិ ឧប្បាទវយតាយ អញ្ញថាភាវំ ជរាយ មរណេន ច ទ្វេធា វិបរិណាមេតព្ពំ. តំ ឧបគមនេន អញ្ញថាភាវី, ឯវំភូតោ ហុត្វាបិ ជីរណភិជ្ជនសភាវេសុ. ភវេសុ សត្តោ លោកោ ឧបរិបិ ភវំយេវ អភិនន្ទតិ. ហេដ្ឋា គហិតមេវ សង្កឌ្ឍិត្វាតិ ‘‘ចក្ខុំ ន មញ្ញតី’’តិអាទិនា ហេដ្ឋា គហិតមេវ ខន្ធធាតុអាយតនាតិ ខន្ធាទិបរិយាយេន ឯកតោ គហេត្វា បុនបិ មញ្ញនាវត្ថុំ ទស្សេតិ. អវសានេ ‘‘តតោ តំ ហោតី’’តិ វុត្តបទេន សទ្ធិំ សព្ពវារេសុ អដ្ឋ អដ្ឋ ហោន្តីតិ ‘‘អដ្ឋចត្តាលីសាយ ឋានេសូ’’តិ វុត្តំ.

បឋមសមុគ្ឃាតសប្បាយសុត្តវណ្ណនា និដ្ឋិតា.