៦-៧. អន្តេវាសិកសុត្តាទិវណ្ណនា

១៥១-១៥២. អន្ត-សទ្ទោ សមីបត្ថេ វត្តតិ ‘‘ឧទកន្តំ វនន្ត’’ន្តិអាទីសុ, កិលេសោ បន អតិអាសន្នេ វសតិ អព្ភន្តរវុត្តិតាយាតិ ‘‘អន្តេវាសិក’’ន្តិ វុត្តោ វិភត្តិអលោបេន យថា ‘‘វនេកុសលោ, កូលេរុក្ខា’’តិ. តេនាហ – ‘‘អនន្តេវាសិកន្តិ អន្តោវសនកិលេសវិរហិត’’ន្តិ. អាចរណកកិលេសវិរហិតន្តិ សមុទាចរណកិលេសរហិតំ. អន្តោ អស្ស វសន្តីតិ អស្ស បុគ្គលស្ស អន្តោ អព្ភន្តរេ ចិត្តេ វសន្តិ បវត្តន្តិ. តេ ឯតំ អធិភវន្តីតិ តេ កិលេសា ឯតំ បុគ្គលំ អភិភវិត្វា អត្តនោ វសេ វត្តេន្តិ. តេនាហ – ‘‘អជ្ឈោត្ថរន្តិ សិក្ខាបេន្តិ វា’’តិ. តេហិ អាចរិយេហីតិ តេហិ កិលេសសង្ខាតេហិ សត្តេ អត្តនោ គតិយំ ឋបេន្តេហិ អាចរិយេហិ. សត្តមំ ហេដ្ឋា កថិតនយមេវាតិ យស្មា ហេដ្ឋា ខន្ធវសេន ទេសនា អាគតា, ឥធ អាយតនវសេនាតិ អយមេវ វិសេសោ.

អន្តេវាសិកសុត្តាទិវណ្ណនា និដ្ឋិតា.