៦. សម្មាសម្ពុទ្ធសុត្តវណ្ណនា

៥៨. អធិកំ សវិសេសំ បយសតិ បយុញ្ជតិ ឯតេនាតិ អធិប្បយាសោ, វិសិដ្ឋបយោគោ. តេនាហ ‘‘អធិកបយោគោ’’តិ. ឥមញ្ហិ មគ្គន្តិ អដ្ឋង្គិកំ អរិយមគ្គមាហ. ឥធាតិ ឥមស្មិំ សុត្តេ. អវត្តមានដ្ឋេនាតិ ពុទ្ធុប្បាទតោ បុព្ពេ ន វត្តមានភាវេន. មគ្គំ ជានាតីតិ សមុទាគមតោ បដ្ឋាយ សបុព្ពភាគំ សសម្ភារវិសយំ សផលំ សឧទ្រយំ អរិយំ មគ្គំ ជានាតិ អវពុជ្ឈតីតិ មគ្គញ្ញូ. វិទិតន្តិ អញ្ញេសម្បិ ញាតំ បដិលទ្ធំ ហត្ថតលេ អាមលកំ វិយ បាកដំ អកាសិ, តថា កត្វា ទេសេសិ. អមគ្គេ បរិវជ្ជនេន មគ្គេ បដិបត្តីតិ តស្ស មគ្គកុសលតា វិយ អមគ្គកុសលតាបិ ឥច្ឆិតព្ពាតិ អាហ ‘‘មគ្គេ ច អមគ្គេ ច កោវិទោ’’តិ. អហំ បឋមំ គតោតិ អហំ បឋមមគ្គេន សមន្នាគតោ.

សម្មាសម្ពុទ្ធសុត្តវណ្ណនា និដ្ឋិតា.