១០. សីលវន្តសុត្តវណ្ណនា

១២២. អាពាធដ្ឋេនាតិ អាទិតោ ឧប្បត្តិតោ បដ្ឋាយ ពាធនដ្ឋេន រុជនដ្ឋេន. អន្តោទោសដ្ឋេនាតិ អព្ភន្តរេ ឯវ ទុស្សនដ្ឋេន កុប្បនដ្ឋេន. ខណនដ្ឋេនាតិ សសនដ្ឋេន. ទុក្ខដ្ឋេនាតិ ទុក្ខមត្តា ទុក្ខភាវេន. ទុក្ខញ្ហិ លោកេ ‘‘អឃ’’ន្តិ វុច្ចតិ អតិវិយ ហននតោ. វិសភាគំ …បេ… បច្ចយដ្ឋេនាតិ យថាបវត្តមានានំ ធាតាទីនំ វិសភាគភូតមហាភូតសមុដ្ឋានស្ស អាពាធស្ស បច្ចយភាវេន. អសកដ្ឋេនាតិ អនត្តនិយតោ. បលុជ្ជនដ្ឋេនាតិ បការតោ ភិជ្ជនដ្ឋេន. សត្តសុញ្ញតដ្ឋេនាតិ សត្តសង្ខាតអត្តសុញ្ញតដ្ឋេន. អត្តាភាវេនាតិ ទិដ្ឋិគតិកបរិកប្បិតស្ស អត្តនោ អភាវេន. សុញ្ញតោ អនត្តតោតិ ឯត្ថ ‘‘បរតោ’’តិ បទស្ស សង្គហោ កាតព្ពោ, តស្មា ‘‘ទ្វីហិ អនត្តមនសិការោ’’តិ វត្តព្ពំ.

សីលវន្តសុត្តវណ្ណនា និដ្ឋិតា.