៦. ឱវាទសុត្តវណ្ណនា

១៤៩. អត្តនោ ឋានេតិ សព្រហ្មចារីនំ ឱវាទកវិញ្ញាបកភាវេន អត្តនោ មហាសាវកដ្ឋានេ ឋបនត្ថំ. អថ វា យស្មា ‘‘អហំ ទានិ ន ចិរំ ឋស្សាមិ, តថា សារិបុត្តមោគ្គល្លានា, អយំ បន វីសំវស្សតាយុកោ, ឱវទន្តោ អនុសាសន្តោ មមច្ចយេន ភិក្ខូនំ មយា កាតព្ពកិច្ចំ ករិស្សតី’’តិ អធិប្បាយេន ភគវា ឥមំ ទេសនំ អារភិ. តស្មា អត្តនោ ឋានេតិ សត្ថារា កាតព្ពឱវាទទាយកដ្ឋានេ. តេនាហ ‘‘ឯវំ បនស្សា’’តិអាទិ. យថាហ ភគវា ‘‘ឱវទ, កស្សប…បេ… ត្វំ វា’’តិ. ទុក្ខេន វត្តព្ពា អប្បទក្ខិណគ្គាហិភាវតោ. ទុព្ពចភាវករណេហីតិ កោធូបនាហាទីហិ. អនុសាសនិយា បទក្ខិណគ្គហណំ នាម អនុធម្មចរណំ, ឆិន្នបដិបត្តិ កតា វាមគ្គាហោ នាមាតិ អាហ ‘‘អនុសាសនិ’’ន្តិអាទិ. អតិក្កម្ម វទន្តេតិ អញ្ញមញ្ញំ អតិក្កមិត្វា អតិមញ្ញិត្វា វទន្តេ. ពហុំ ភាសិស្សតីតិ ធម្មំ កថេន្តោ កោ វិបុលំ កត្វា កថេស្សតិ. អសហិតន្តិ បុព្ពេនាបរំ នសហិតំ ហេតុបមាវិរហិតំ. អមធុរន្តិ ន មធុរំ ន កណ្ណសុខំ ន បេមនីយំ. លហុញ្ញេវ ឧដ្ឋាតិ អប្បវត្តនេន កូលដ្ឋានំ វិយ តស្ស កថនំ.

ឱវាទសុត្តវណ្ណនា និដ្ឋិតា.