៣. អស្សុសុត្តវណ្ណនា

១២៦. កន្ទនំ សសទ្ទំ, រោទនំ បន កេវលមេវាតិ អាហ ‘‘កន្ទន្តានន្តិ សសទ្ទំ រុទមានាន’’ន្តិ. បវត្តន្តិ សន្ទនវសេន បវត្តំ. ‘‘សិនេរុរស្មីហិ បរិច្ឆិន្នេសូ’’តិ សង្ខេបេន វុត្តមត្ថំ វិវរន្តោ ‘‘សិនេរុស្សា’’តិអាទិមាហ. មណិមយន្តិ ឥន្ទនីលមណិមយំ. សិនេរុស្ស បុព្ពទក្ខិណកោណសមបទេសា ‘‘បុព្ពទក្ខិណបស្សា’’តិ អធិប្បេតា. តេហិ និក្ខន្តរជតរស្មិយោ ឥន្ទនីលរស្មិយោ ច ឯកតោ ហុត្វា. តាសំ រស្មីនំ អន្តរេសូតិ តាសំ ចតូហិ កោណេហិ និក្ខន្តរស្មីនំ ចតូសុ អន្តរេសុ. ចត្តារោតិ ទក្ខិណាទិភេទា ចត្តារោ មហាសមុទ្ទា ហោន្តិ. វិអសនន្តិ វិសេសេន ខេបនំ. កិំ បន តន្តិ អាហ ‘‘វិនាសោតិ អត្ថោ’’តិ.

អស្សុសុត្តវណ្ណនា និដ្ឋិតា.