៤. ទុតិយសមណព្រាហ្មណសុត្តវណ្ណនា

១៤. ឥមេ ធម្មេ កតមេ ធម្មេតិ ច ឯត្ថ ឥតិ-សទ្ទោ អាទិអត្ថោ. តេន ‘‘ឥមេសំ ធម្មានំ កតមេសំ ធម្មាន’’ន្តិ ឥមេសំ បទានំ សង្គហោ. ឯតានិ ហិ បទានិ ជរាមរណាទីនំ សាធារណភាវេន វុត្តានិ ឥមិស្សា ទេសនាយ បបញ្ចភូតានីតិ អាហ ‘‘ឯត្តកំ បបញ្ចំ កត្វា កថិតំ, ទេសនំ…បេ… អជ្ឈាសយេនា’’តិ. ឥមិនា តានេវ ជរាមរណាទីនិ គហេត្វា បុគ្គលជ្ឈាសយវសេន អាទិតោ ‘‘ឥមេ ធម្មេ’’តិអាទិនា សព្ពបទសាធារណតោ ទេសនា អារទ្ធា. យថានុលោមសាសនញ្ហិ សុត្តន្តទេសនា, ន យថាធម្មសាសនន្តិ.

ទុតិយសមណព្រាហ្មណសុត្តវណ្ណនា និដ្ឋិតា.