៧. សុទ្ធិកសុត្តវណ្ណនា

១៩៣. សុទ្ធិកបញ្ហស្សាតិ ‘‘នាព្រាហ្មណោ សុជ្ឈតី’’តិ ឯវំ សុទ្ធសន្និស្សិតស្ស បញ្ហស្ស. សីលសម្បន្នោតិ បញ្ចវិធនិយមលក្ខណេន សីលេន សមន្នាគតោ. តបោកម្មន្តិ អនសនបញ្ចាតបតប្បនាទិបរិភេទនតបោកម្មំ ករោន្តោបិ. វិជ្ជាតិ តយោ វេទាតិ វទន្តិ ‘‘តាយ ឥធលោកត្ថំ បរលោកត្ថំ ញាយន្តី’’តិ កត្វា. គោត្តចរណន្តិ គោត្តសង្ខាតំ ចរណំ. ព្រាហ្មណោ សុជ្ឈតិ ជេដ្ឋជាតិកត្តា. តថា ហិ សោ ឯវ តបំ អាចរិតុំ លភតិ, ន ឥតរោ. អញ្ញា លាមិកា បជាតិ ឥតរវណ្ណំ វទតិ. វចនសហស្សម្បីតិ គាថានេកសហស្សម្បិ. អន្តោ កិលេសេហិ បូតិកោ សភាវេន បូតិកោ. កិលិដ្ឋេហិ កាយកម្មាទីហិ កាយទុច្ចរិតាទីហិ.

សុទ្ធិកសុត្តវណ្ណនា និដ្ឋិតា.