១. សម្ពហុលសុត្តវណ្ណនា

១៥៧. ជដាចុម្ពដកេនាតិ សីសេ បដិមុក្កេន ជដាកលាបេន. អបរិគ្គហព្រាហ្មណបព្ពជិតា ហិ ជដាយ ឧញ្ឆាចរិយំ ចរន្តិ. ឧទុម្ពរទណ្ឌញ្ហិ អត្តគុត្តត្ថាយ គហិតំ តេសំ អប្បិច្ឆភាវប្បកាសនំ. តេនាហ ‘‘អប្បិច្ឆភាវប្បកាសនត្ថ’’ន្តិ. សីសំ ឱកម្បេត្វាតិ ឯត្ថ អតិវិយ សីសស្ស ឱកម្បិតភាវំ ទស្សេតុំ ‘‘ហនុកេន ឧរំ បហរន្តោ អធោនតំ កត្វា’’តិ វុត្តំ. ជិវ្ហំ នីហរិត្វាតិ លម្ពនចាលនវសេន មុខតោ និក្ខាមេត្វា. តេនាហ ‘‘ឧទ្ធ’’ន្តិអាទិ. តិសាខន្តិ តិភង្គភកុដិ វិយ នលាដេ ជាតត្តា នលាដិកំ. តេនាហ ‘‘នលាដេ ឧដ្ឋិតំ វលិត្តយ’’ន្តិ, តិភង្គវលិកំ នលាដេ កត្វាតិ អត្ថោ. អត្តនោវ តេលេតិ អត្តនោវ បាបកម្មនិព្ពត្តកេ តេលេ, បចិតព្ពដ្ឋានគេហេតិ អធិប្បាយោ.

សម្ពហុលសុត្តវណ្ណនា និដ្ឋិតា.