២. អយ្យិកាសុត្តវណ្ណនា

១៣៣. ជរាជិណ្ណាតិ ជរាយ ជិណ្ណា. តេន បាកដជរាយ មត្ថកប្បត្តិមាហ. វយោវុឌ្ឍាតិ វយសា វុឌ្ឍា. តេន បច្ឆិមវយស្ស ឱសក្កសម្បវត្តិំ វទតិ. ជាតិមហល្លិកាតិ ជាតិមហត្តគតា. ចិរកាលំ អតិក្កន្តាតិ ទ្វេ តយោ រាជបរិវដ្ដេ វីតិវត្តា. វយោ-សទ្ទោ សាធារណវចនោបិ ជិណ្ណសទ្ទសន្និធានតោ ឱសានវយំ ឯវ វទតីតិ អាហ ‘‘បច្ឆិមវយំ សម្បត្តា’’តិ. អយ្យិកាតិ មាតាមហិំ សន្ធាយ វទតិ. ហត្ថី ឯវ រតនភូតោ ហត្ថិរតនន្តិ អាហ ‘‘សតសហស្សគ្ឃនកេនា’’តិអាទិ. សព្ពានិ តានីតិ កុម្ភការភាជនានិ, តេហិ សទ្ធិំ សត្តសន្តានស្ស បមាណំ ទស្សេន្តោ ‘‘តេសុ ហី’’តិអាទិមាហ, តំ សុវិញ្ញេយ្យមេវ.

អយ្យិកាសុត្តវណ្ណនា និដ្ឋិតា.