៧. ពុទ្ធវន្ទនាសុត្តវណ្ណនា

២៦៣. ឧដ្ឋហាតិ ឧដ្ឋានំ កាយិកវីរិយំ ករោហិ. តេនាហ ‘‘វិចរ, លោកេ’’តិ. ចេតសិកវីរិយំ បន ភគវតា មត្ថកំ បាបិតមេវ. តេនាហ ‘‘វិជិតសង្គាមា’’តិ. ទ្វាទសយោជនិកស្ស ឧច្ចភាវេន. វិត្ថារតោ បន អាយាមតោ ច អនេកយោជនសតសហស្សបរិមាណចក្កវាឡំ អតិព្យាបេត្វា ឋិតស្ស. បន្នភារាតិ បាតិតភារ. និក្ខេបិតព្ពតោ ភារាតិ អាហ ‘‘ឱរោបិតខន្ធា’’តិអាទិ. តេ ហិ តំសមង្គិនោ បុគ្គលស្ស សម្បាតនដ្ឋេន ភារា នាម. វុត្តញ្ហេតំ ‘‘ភារា ហវេ បញ្ចក្ខន្ធា’’តិ (សំ. និ. ៣.២២). តទេកទេសា ច កិលេសាភិសង្ខារា. បន្នរសាយ បុណ្ណមាយ រត្តិន្តិ យថា បន្នរសបុណ្ណមាយ រត្តិយំ បរិបុណ្ណកាលេ ឧបក្កិលេសវិមុត្តោ ចន្ទោ សោភតិ, ឯវំ តវ ចិត្តំ សព្ពសោ ឧបក្កិលេសវិមុត្តំ សោភតីតិ អធិប្បាយោ.

ពុទ្ធវន្ទនាសុត្តវណ្ណនា និដ្ឋិតា.