៨. គហដ្ឋវន្ទនាសុត្តវណ្ណនា

២៦៤. បុថុទ្ទិសាតិ ពហុទិសា. កា បន តាតិ អាហ ‘‘ចតស្សោ ទិសា ចតស្សោ អនុទិសា ចា’’តិ. អនុទិសាគហណេន ចេត្ថ ឧទ្ធំ អធោបិ គយ្ហតីតិ ច ទស្សេតិ. ភូមិវាសិនោតិ ភូមិបដិពទ្ធវុត្តិនោ. ឯតេន រុក្ខបព្ពតនិវាសិនោបិ គហិតា ហោន្តិ. ចិររត្តសមាហិតចិត្តេតិ ឧបចារប្បនាឈានានិ ឧប្បាទេត្វា អបរិហីនជ្ឈានតាយ ចិរកាលំ សមាហិតចិត្តេ. អាបាណកោដិកន្តិ ជីវិតបរិយន្តំ យាវជីវំ. ឯវមាទីតិ អាទិ-សទ្ទេន អវសេសបុញ្ញកិរិយវត្ថូនិ សង្គណ្ហាតិ. និច្ចសីលវសេន បញ្ចហិ, និយមសីលវសេន ទសហិ. បិ-សទ្ទេន តតោ កតិបយេហិ ឧបោសថសីលវសេន អដ្ឋហិបីតិ ទស្សេតិ. ធម្មិកេហីតិ ធម្មតោ អនបេតេហិ. បមុខោតិ បមោក្ខោ.

គហដ្ឋវន្ទនាសុត្តវណ្ណនា និដ្ឋិតា.