៦. យជមានសុត្តវណ្ណនា

២៦២. យជន្តានន្តិ ទក្ខិណេយ្យំ ឧទ្ទិស្ស ទេន្តានំ. អដ្ឋុប្បត្តិកោ សុត្តនិក្ខេបោតិ ទស្សេត្វា អត្ថវណ្ណនំ កាតុំ ‘‘តទា កិរា’’តិអាទិ វុត្តំ. អគ្គន្តិ សេដ្ឋំ. តេហិ តេហិ វា យថាលទ្ធសប្បិអាទយោ មា នស្សន្តុ, អគ្គភាវេន គហិតានិ សប្បិអាទីនិ កេវលំ អគ្គិម្ហិ ឈាបនេន, ទេវា មនុស្សា មិច្ឆាគាហេន មា នស្សន្តុ. តក្កេនាតិ តក្កមត្តេន. ‘‘កថេមា’’តិ អម្ហេ មញ្ញថ, ឥទានិ បស្សថ, បច្ចក្ខតោ អយំ វោ…បេ… អាគច្ឆតីតិ អាហំសូតិ យោជនា.

ឧបធិវិបាកន្តិ ឧបធីសុ វា វិបច្ចតិ, ឧបធយោ វា វិបាកា ឯតស្សាតិ ឧបធិវិបាកំ. វិប្ផារវន្តំ ហោតិ វិបុលបក្ខតាយ. ភិក្ខុសង្ឃស្ស អទំសុ ‘‘សម្មាសម្ពុទ្ធេន មហាព្រហ្មុនា ច ឯវំ ឱវាទោ ទិន្នោ’’តិ.

យជមានសុត្តវណ្ណនា និដ្ឋិតា.