៣. មហាលិសុត្តវណ្ណនា

២៥៩. សោតិ សក្កោ ទេវរាជា. ពហុវចនេ វត្តព្ពេ ឯកវចនំ វុត្តំ. វុច្ចតីតិ វចនំ, អត្ថោ. តស្មា ពហុវចនេតិ ពហុម្ហិ អត្ថេតិ អត្ថោ. យថា បដិបជ្ជន្តោ អនុក្កមេន តេ ធម្មេ សមាទិយិត្វា សក្កោ សក្កត្តំ អជ្ឈគា, តំ បដិបត្តិំ ទស្សេតុំ ‘‘សក្កោ កិរា’’តិអាទិ វុត្តំ. អនន្តរេតិ សក្កភាវស្ស អតីតានន្តរេ អត្តភាវេ. តំ សព្ពន្តិ សក្កស្ស មឃមាណវកាលេ សម្មាបដិបត្តិំ, តាយ សក្កភាវូបគមនញ្ចាតិ តំ សព្ពំ. វុត្តោ, តស្មា តត្ថ វុត្តនយេនេវ វេទិតព្ពោតិ អធិប្បាយោ.

មហាលិសុត្តវណ្ណនា និដ្ឋិតា.