២. សក្កនាមសុត្តវណ្ណនា

២៥៨. មនុស្សភូតោតិ មនុស្សេសុ ភូតោ, មនុស្សត្តំ វា បត្តោ. អាវសថន្តិ និវាសដ្ឋានំ ការេត្វា អទាសិ, តស្មា វាសំ អទាសីតិ វាសវោ. អត្ថ-សទ្ទោ ឥធ ការណបរិយាយោតិ អាហ ‘‘សហស្សម្បិ ការណាន’’ន្តិ. ស្វាយមត្ថោ ហេដ្ឋា វិភាវិតោវ. វិនិច្ឆិនតិ, តស្មា សហស្សំ បញ្ញាអក្ខីនិ ឯតស្សាតិ សហស្សក្ខោ. មឃំ វុច្ចតិ ធនំ, តំ បន សទ្ធាសង្ខាតំ មឃំ អស្ស អត្ថីតិ មឃវា. បុរេ ទានំ ទទាតីតិ បុរិន្ទទោ អនុនាសិកលោបំ អកត្វា. បុញ្ញានិ កាតុំ សក្កោតីតិ សក្កោ.

សក្កនាមសុត្តវណ្ណនា និដ្ឋិតា.