១០. សង្ឃវន្ទនាសុត្តវណ្ណនា

២៦៦. បូតិម្ហិ ទេហេ មាតុ សរីរេ សយនតោ, អត្តនោ ឯវ វា បូតិទេហំ សរីរំ តស្មិំ ឋិតតាយ អវត្ថរិត្វា សយនតោ បូតិទេហសយាតិ យោជនា. កុណបម្ហេតេតិ ឯតេ មនុស្សា អសុចិទុគ្គន្ធជេគុច្ឆបដិក្កូលេ មាតុកុច្ឆិសង្ខាតេ កុណបស្មិំ ទស មាសេ និមុគ្គា. តេសំ កិន្នាម ត្វំ បិហយសីតិ យោជនា. ឯតេសំ ឯតំ វិហយាមីតិ ឯតេសំ ឥសីនំ ឯតំ សម្មាបដិបត្តិំ វិហយាមិ. ឥទានិ តំ បដិបត្តិំ ទស្សេតុំ ‘‘ន តេ សំ កោដ្ឋេ ឱបេន្តី’’តិ វុត្តំ. ធញ្ញំ កោដ្ឋេ ន បក្ខិបន្តិ បក្ខិបិតព្ពស្ស ច អភាវតោ. តេនាហ ‘‘ន ហិ ឯតេសំ ធញ្ញ’’ន្តិ. បរេសំ និដ្ឋិតន្តិ បរេសំ គហិតំ សន្តកំ តេសំ បាកាយ និដ្ឋិតំ. ភិក្ខាចារវត្តេនាតិ បិណ្ឌាចរិយាយ. ឯសមានា បរិយេសន្តា. ឯវំ បរិយិដ្ឋេន. យាបេន្តិ, ន ឯសន្តិ អនេសនំ. សុសមាទិន្នសុន្ទរវតាតិ សុដ្ឋុ សមាទិន្នសោភនវតា.

ឯវំ សុភាសិតភាសិនោតិ គន្ថធុរវិបស្សនាធុរានំ វសេន គុណបរិមាណសុភាសិតស្សេវ ភាសនសីលា. អរិយេន តុណ្ហីភូតេន តុណ្ហីភូតា. តតោ ឯវ មនស្ស សាតិសយំ សមញ្ចរា. គហិតទណ្ឌេសុ បរាមាសាទិបយុត្តេសុ ទណ្ឌាទានាទិហេតុ ឧប្បជ្ជនកកិលេសបរិឡាហាភាវតោ និព្ពុតា. តេនាហ ‘‘វិស្សដ្ឋទណ្ឌា’’តិ. សាទានេសូតិ សភវាទានេសុ. អនាទានាតិ តព្ពិរហិតា. តេនាហ ‘‘ភវយោនី’’តិអាទិ.

សង្ឃវន្ទនាសុត្តវណ្ណនា និដ្ឋិតា.

ទុតិយវគ្គវណ្ណនា និដ្ឋិតា.