៦. សទ្ធាសុត្តវណ្ណនា

៣៦. តត្វស្សាតិ ឱ-ការស្ស វ-ការាទេសំ អ-ការស្ស ច លោបំ កត្វា និទ្ទេសោតិ អាហ ‘‘តតោ អស្សា’’តិ. ‘‘តតស្សា’’តិ វា បាឋោ, តតោតិ ច សទ្ធាហេតូតិ អត្ថោ. នានុបតន្តីតិ ន វត្តន្តិ. បមាទំ ករោន្តីតិ បមជ្ជន្តិ, មិច្ឆា បដិបជ្ជន្តីតិ អត្ថោ. លក្ខណានីតិ អនិច្ចាទិលក្ខណានិ. ឧបនិជ្ឈាយតីតិ ឧបេច្ច ញាណចក្ខុនា បេក្ខតិ, អនុបស្សតីតិ អត្ថោ. អាគតកិច្ចន្តិ អាហតកិច្ចំ, អយមេវ វា បាឋោ. សាធេតីតិ អសម្មោហបដិវេធវសេន និប្ផាទេតិ, តថលក្ខណំ និរោធសច្ចំ ឧបនិជ្ឈាយតីតិ អយមត្ថោ មគ្គេបិ វត្តព្ពោ តេន វិនា អសម្មោហបដិវេធស្ស អសម្ភវតោ. កសិណារម្មណស្សាតិ ឥទំ លក្ខណវចនំ. អកសិណារម្មណសមាបត្តិយោបិ ហិ សន្តីតិ. យថា ច កសិណារម្មណានិ អដ្ឋន្នំ សមាបត្តីនំ អវសេសានញ្ច តទារម្មណានំ បច្ចវេក្ខណវសេន ចិត្តានំ, ឯវំ តេន តានិ អារម្មណានិ គហិតានីតិ ‘‘កសិណារម្មណស្ស’’ឥច្ចេវ វុត្តំ. បរមំ ឧត្តមំ សុខន្តិ វត្តព្ពតោ បរមសុខំ អរហត្តំ.

សទ្ធាសុត្តវណ្ណនា និដ្ឋិតា.