៨. ហិរីសុត្តវណ្ណនា

១៨. និសេធេតីតិ និវារេតិ បវត្តិតុំ ន ទេតិ. បុច្ឆតិ ទេវតា. អបហរន្តោតិ អបនេន្តោ, យថា សព្ពេន សព្ពំ អក្កោសវត្ថុ ន ហោតិ, ឯវំ បរិហរន្តោតិ អត្ថោ. ពុជ្ឈតិ សារថិវិធំ. អត្តនិ និបាតំ ន ទេតិ, អាជានីយោ ហិ យុត្តំ បជានាតិ. អភូតេន អភូតក្កោសេន បរិមុត្តោ នាម នត្ថិ ពាលានញ្ច ជនានំ បរាបវាទេ យុត្តបយុត្តភាវតោ. តេនាហ ភគវា –

‘‘និន្ទន្តិ តុណ្ហិមាសីនំ, និន្ទន្តិ ពហុភាណិនំ;

មិតភាណិម្បិ និន្ទន្តិ, នត្ថិ លោកេ អនិន្ទិតោ’’តិ. (ធ. ប. ២២៧);

តនុយាតិ វា កតិបយា. តេនាហ ‘‘អប្បកា’’តិ. សទា សតាតិ ហិរិនិសេធភាវេ ការណវចនំ. បប្បុយ្យាតិ បត្វា អធិគន្ត្វា. វានតោ និក្ខន្តត្តា និព្ពានំ, អសង្ខតធាតុ.

ហិរីសុត្តវណ្ណនា និដ្ឋិតា.