១១. បញ្ចសតិកក្ខន្ធកំ

១. ខុទ្ទានុខុទ្ទកសិក្ខាបទកថា

៤៤១. បញ្ចសតិកក្ខន្ធកេ ‘‘ចត្តារិ…បេ… ខុទ្ទកានី’’តិ ឯវមាទិ វុត្តន្តិ សម្ពន្ធោ. បរិយាយេនាតិ ការណេន. ធូមកាលិកន្តិ ឯត្ថ ធូមស្ស កាលោ ធូមកាលោ, ធូមស្ស ឧដ្ឋិតកាលោតិ អត្ថោ. សោ ឯតស្សត្ថីតិ ធូមកាលិកំ, សិក្ខាបទបញ្ញត្តំ. ឥតិ ឥមមត្ថំ ទស្សេន្តោ អាហ ‘‘យាវា’’តិអាទិ.

៤៤៣. ឥទន្តិ ‘‘កតមានិ បន ភន្តេ ខុទ្ទានុខុទ្ទកានិ សិក្ខាបទានី’’តិ អបុច្ឆនំ. ‘‘តយា’’តិ ឥមិនា ឥទំ តេតិ ឯត្ថ តេសទ្ទស្ស ‘‘តុយ្ហំ, តវា’’តិ អត្ថេ បដិក្ខិបតិ. អាបត្តិន្តិ ទុក្កដាបត្តិំ. ហីតិ សច្ចំ, យស្មា វា. តេតិ ថេរា. ‘‘សង្ឃោ…បេ… ន សមុច្ឆិន្ទតី’’តិ ឯតំ វចនំ អនុស្សាវិតន្តិ យោជនា. ‘‘ទេសេហិ តំ អាវុសោ ទុក្កដ’’ន្តិ ឥទម្បិ ច វុត្តន្តិ សម្ពន្ធោ. ថេរោ បនាតិ អានន្ទត្ថេរោ បន អាហាតិ សម្ពន្ធោ. តត្ថាតិ អបុច្ឆនេ. យថាតិ យេនាការេន. ចតូសុ ឋានេសូតិ ‘‘ភគវតោ វស្សិកសាដិកំ អក្កមិត្វា សិព្ពេសី’’តិអាទីសុ ចតូសុ ឋានេសុ. ឯត្ថាតិ បញ្ចសតិកក្ខន្ធកេ.

ឥតិ បញ្ចសតិកក្ខន្ធកវណ្ណនាយ យោជនា សមត្តា.