៤០. និស្សយមុច្ចនកកថា

១០៣. ឱគណេនាតិ ឯត្ថ ឱត្យូបសគ្គោ លាមកត្ថវាចកោតិ អាហ ‘‘បរិហីនគណេនា’’តិ. អត្តនោ វុឌ្ឍតរស្សេវ ភិក្ខុស្ស សន្តិកេ និស្សយោ គហេតព្ពោតិ អាហ ‘‘សចាយំ វុឌ្ឍតរ’’ន្តិអាទិ. តត្ថ អយន្តិ អព្យត្តោ ភិក្ខុ. ឧបសម្បទាយាតិ ឧបសម្បាទេត្វា. អាយស្មតោតិ អាយស្មន្តំ, ឧបយោគត្ថេ ចេតំ សាមិវចនំ. អាយស្មតោ វា ឱវាទន្តិ យោជនា. សព្ពត្ថាតិ សព្ពេសុ. អាបុច្ឆនេសូតិ ទិសាបក្កមនាទិអត្ថាយ អាបុច្ឆនេសុ. ឯត្ថាតិ ឥមស្មិំ និស្សយវសនដ្ឋានេ. តន្តិ តត្តកំ សុតំ. តស្សាតិ សុតស្ស.