៧. និសីទនសិក្ខាបទំ

៥៣១. សត្តមេ កត្ថាតិ កិស្មិំ ខន្ធកេ, កិស្មិំ វត្ថុស្មិំ វា. ហីតិ សច្ចំ. តត្ថាតិ ចីវរក្ខន្ធកេ, បណីតភោជនវត្ថុស្មិំ វា. ‘‘យថា នាមា’’តិ ឥមិនា ‘‘សេយ្យថាបី’’តិ បទស្ស អត្ថំ ទស្សេតិ, ‘‘បុរាណោ ចម្មការោ’’តិ ឥមិនា ‘‘បុរាណាសិកោដ្ឋោ’’តិ បទស្ស. ចម្មការោ ហិ អសិនា ចម្មំ កុដតិ ឆិន្ទតីតិ ‘‘អសិកោដ្ឋោ’’តិ វុច្ចតិ. វត្ថុប្បន្នកាលមុបនិធាយ វុត្តំ ‘‘បុរាណោ’’តិ. តមេវូបមំ បាកដំ ករោន្តោ អាហ ‘‘យថា ហី’’តិ. ហីតិ តប្បាកដីករណំ, តំ បាកដំ ករិស្សាមីតិ ហិ អត្ថោ. ចម្មការោ កឌ្ឍតីតិ សម្ពន្ធោ. វិត្ថតន្តិ វិសាលំ. សោបីតិ ឧទាយីបិ. តំ និសីទនំ កឌ្ឍតីតិ យោជនា. តេនាតិ កឌ្ឍនហេតុនា. តន្តិ ឧទាយិំ. សន្ថតសទិសន្តិ សន្ថតេន សទិសំ. ឯកស្មិំ អន្តេតិ ឯកស្មិំ កោដ្ឋាសេ, ផាលេត្វាតិ សម្ពន្ធោតិ. សត្តមំ.