៣. វិកាលគាមប្បវិសនសិក្ខាបទំ

៥០៨. តតិយេ ‘‘តិរច្ឆានភូតំ កថ’’ន្តិ ឥមិនា ‘‘តិរច្ឆានកថ’’ន្តិ បទស្ស តុល្យនិស្សិតសមាសំ ទស្សេតិ. រាជបដិសំយុត្តន្តិ រាជូហិ បដិសំយុត្តំ.

៥១២. សម្ពហុលា ភិក្ខូតិ សម្ពន្ធោ. តស្មិំ គាមេតិ តស្មិំ បឋមបវិសនគាមេ. តំ កម្មន្តិ តំ ឥច្ឆិតកម្មំ. អន្តរាតិ គាមវិហារានមន្តរេ. ភុម្មត្ថេ ចេតំ និស្សក្កវចនំ.

កុលឃរេ វាតិ ញាតិកុលឧបដ្ឋាកកុលឃរេ វា. តេលភិក្ខាយ វាតិ តេលយាចនត្ថាយ វា. បស្សេតិ អត្តនោ បស្សេ សមីបេតិ វុត្តំ ហោតិ. តេនាតិ គាមមជ្ឈមគ្គេន. អនោក្កម្មាតិ អនោក្កមិត្វា, អបក្កមិត្វាតិ អត្ថោតិ. តតិយំ.