៧. សញ្ចិច្ចសិក្ខាបទំ

៤៦៤. សត្តមេ ឧបបុព្ពទហធាតុស្ស សកម្មិកត្តា ការិតន្តោគធភាវំ ទស្សេតុំ វុត្តំ ‘‘ឧប្បាទេន្តី’’តិ. ‘‘អនុបសម្បន្នស្សា’’តិ ឯត្ថ អការស្ស សទិសត្ថំ ទស្សេតុំ វុត្តំ ‘‘សាមណេរស្សា’’តិ. សាមណេរោបិ ហិ ឧបសម្បន្នេន សទិសោ ហោតិ សណ្ឋានេន ច បុរិសភាវេន ច. សាមណេរស្ស កុក្កុច្ចំ ឧបទហតីតិ សម្ពន្ធោ. និសិន្នំ មញ្ញេ, និបន្នំ មញ្ញេ, ភុត្តំ មញ្ញេ, បីតំ មញ្ញេ, កតំ មញ្ញេតិ យោជនា. និសិន្នន្តិ និសីទិតំ. និបន្នន្តិ និបជ្ជិតន្តិ. សត្តមំ.