២. សប្បាណកសិក្ខាបទំ

៣៨៧. ទុតិយេ សហ បាណេហីតិ សប្បាណកំ ឧទកន្តិ ទស្សេន្តោ អាហ ‘‘យេ បាណកា’’តិអាទិ. ហីតិ សច្ចំ. បត្តបូរម្បិ ឧទកន្តិ សម្ពន្ធោ. តាទិសេនាតិ សប្បាណកេន. ធោវតោបិ បាចិត្តិយន្តិ យោជនា. ឧទកសោណ្ឌិន្តិ សិលាមយំ ឧទកសោណ្ឌិំ. បោក្ខរណិន្តិ សិលាមយំ បោក្ខរណិំ. ឧដ្ឋាបយតោបិ បាចិត្តិយន្តិ សម្ពន្ធោ. តតោតិ សោណ្ឌិបោក្ខរណីហិ. ឧទកស្សាតិ ឧទកេន, បូរេ ឃដេ អាសិញ្ចិត្វាតិ សម្ពន្ធោ. តត្ថាតិ ឧទកេ. ឧទកេតិ ឧទកសណ្ឋានកបទេសេ អាសិញ្ចិតឧទកេ. បតិស្សតីតិ សោណ្ឌិបោក្ខរណីហិ គហិតឧទកំ បតិស្សតីតិ. ទុតិយំ.