១០. ចូឡសារោបមសុត្តវណ្ណនា

៣១២. បិង្គលធាតុកោតិ បិង្គលសភាវោ បិង្គលច្ឆវិកោ, បិង្គលក្ខោតិ វា អត្ថោ. បព្ពជិតសមូហសង្ខាតោ សង្ឃោ, ន សីលាទិគុណេហិ សង្គហិតព្ពភាវេន. សង្ឃោ ឯតេសំ អត្ថិ បរិវារភូតោតិ សង្ឃិនោ. ស្វេវាតិ សោ ឯវ បព្ពជិតសមូហសង្ខាតោ. អាចារសិក្ខាបនវសេនាតិ អត្តនា បរិកប្បិតអចេលវតាទិអាចារសិក្ខាបនវសេន. បញ្ញាតាតិ យថាសកំ សមាទិន្នវតវសេន ចេវ វិញ្ញាតលទ្ធិវសេន ច បញ្ញាតា. លទ្ធិករាតិ តស្សា មិច្ឆាទិដ្ឋិយា ឧប្បាទកា. ពហុជនស្សាតិ បុថុជនស្ស. តស្ស បន អាគមសម្បទាបិ នាម នត្ថិ, កុតោ អធិគមោតិ ឯកំសតោ អន្ធបុថុជ្ជនោ ឯវាតិ អាហ ‘‘អស្សុតវតោ អន្ធពាលបុថុជ្ជនស្សា’’តិ. ន ហិ វិញ្ញូ អប្បសាទនីយេ បសីទន្តិ. មង្គលេសុ កាតព្ពទាសកិច្ចករោ ទាសោ មង្គលទាសោ.

តន្តាវុតានន្តិ តន្តេ បសារេត្វា វីតានំ. គណ្ឋនកិលេសោតិ សំសារេ ពន្ធនកិលេសោ. ឯវំ វាទិតាយាតិ ឯវំ បដិញ្ញតាយ, ឯវំ ទិដ្ឋិតាយ វា. និយ្យានិកាតិ និយ្យានគតិសប្បាដិហីរកា អនុបារម្ភភូតត្តាតិ អធិប្បាយោ. នោ ចេ និយ្យានិកាតិ អានេត្វា យោជនា. តេសំ សព្ពញ្ញុបដិញ្ញាយ អភូតត្តា តស្សា អភូតភាវកថនេន តស្ស ព្រាហ្មណស្ស ន កាចិ អត្ថសិទ្ធីតិ អាហ ‘‘នេសំ អនិយ្យានិកភាវកថនេន អត្ថាភាវតោ’’តិ.

៣១៨. និហីនលោកាមិសេ លីនោ អជ្ឈាសយោ ឯតស្ស, ន បន និព្ពានេតិ. លីនជ្ឈាសយោ. សាសនំ សិថិលំ កត្វា គណ្ហាតិ សិក្ខាយ ន តិព្ពគារវត្តា.

៣២៣. ហេដ្ឋាតិ អនន្តរាតីតសុត្តេ មហាសារោបមេ. បឋមជ្ឈានាទិធម្មា វិបស្សនាបាទកាតិ វិបស្សនាយ បទដ្ឋានភូតា. ឥធាតិ ឥមស្មិំ ចូឡសារោបមេ អាគតា. និរោធបាទកាតិ អនាគាមិនោ, អរហន្តោ វា និរោធសមាបត្តិំ សមាបជ្ជិតុំ សមត្ថា. តស្មាតិ និរោធបាទកត្តា. បឋមជ្ឈានាទិធម្មា ញាណទស្សនតោ ឧត្តរិតរាតិ វេទិតព្ពា.

ចូឡសារោបមសុត្តវណ្ណនាយ លីនត្ថប្បកាសនា សមត្តា.

និដ្ឋិតា ច ឱបម្មវគ្គវណ្ណនា.