២៣. អនោលោកិយនិទ្ទេសវណ្ណនា

១៨១. សារត្តោតិ សំរត្តោ, សញ្ជាតរាគចិត្តោតិ អត្ថោ. ឥត្ថិយាតិ តទហុជាតាយបិ បដសតនិវត្ថាយ អនោកាសុបនិជ្ឈាយនេ អន្តមសោ តិរច្ឆានគតានម្បិ ទុក្កដមេវ. ភិក្ខាទាយិយាតិ ឧបលក្ខណមត្តំ, ឥត្ថី វា ហោតុ បុរិសោ វា, ភិក្ខាទានសមយេ អសារត្តេនាបិ មុខំ ន ឧល្លោកេតព្ពំ. ឧជ្ឈានំ លាមកតោ សំចិន្តនំ, កោបោ, តត្ថ សញ្ញា អស្សាតិ ឧជ្ឈានសញ្ញី. ឥធ បន គិលានោបិ ន មុច្ចតិ. អាទាសេ ឧទកបត្តេតិ ឥមិនា សេសេសុ កំសបត្តាទីសុ កញ្ជិយាទីសុ ច មុខនិមិត្តំ បញ្ញាយតិ, តេសំ សង្គហោ. ‘‘សញ្ឆវិ នុ ខោ មេ វណ្ណោ, នោ, ជិណ្ណោ នុ ខោម្ហិ, នោ’’តិ បន ឱលោកេតុំ វដ្ដតិ. អស្សាតិ ភិក្ខុនោ.

អនោលោកិយនិទ្ទេសវណ្ណនា និដ្ឋិតា.