១៩. ន្ហានកប្បនិទ្ទេសវណ្ណនា

១៦៨. បុរតោតិ (ចូឡវ. ៣៧២) ថេរានំ បុរតោ ឧបរិ វា ន ច ន្ហាយេយ្យាតិ អត្ថោ.

១៦៩-១៧១. កុដ្ដត្ថម្ភតរុដ្ដានេតិ ឯត្ថ (ចូឡវ. ២៤៣; ចូឡវ. អដ្ឋ. ២៤៣) កុដ្ដេ វា ថម្ភេ វា តរុម្ហិ វា អដ្ដានផលកេ វា កាយំ ន ឃំសយេតិ អត្ថោ. គន្ធព្ពហត្ថោ នាម មក្កដហត្ថសទិសោ ទារុអាទិមយោ. កុរុវិន្ទកសុត្តិយាតិ កុរុវិន្ទសុត្តិយា. មល្លកេន វា អញ្ញមញ្ញំ វា. ‘‘ន ភិក្ខវេ វិគ្គយ្ហ បរិកម្មំ ការាបេតព្ពំ. យោ ការាបេយ្យ, អាបត្តិ ទុក្កដស្សា’’តិ (ចូឡវ. ២៤៣) ឯវំ វុត្តំ វិគ្គហបរិកម្មំ សន្ធាយ ‘‘អញ្ញមញ្ញំ វា’’តិ វុត្តំ.

ឥទានិ កប្បិយានិ ទស្សេតុំ ‘‘កបាលិដ្ឋកខណ្ឌានី’’តិអាទិមាហ. សព្ពេសំ វដ្ដតីតិ សម្ពន្ធោ. គិលានស្សបិ (ចូឡវ. អដ្ឋ. ២៤៣) អគិលានស្សបិ ឥមានិ កបាលិដ្ឋកខណ្ឌាទីនិ កាយឃំសនេ វដ្ដន្តិ. បុថុបាណីតិ (ចូឡវ. ២៤៤) ហត្ថបរិកម្មំ វុច្ចតិ. តស្មា សព្ពេសំ ហត្ថេន បិដ្ឋិបរិកម្មំ កាតុំ វដ្ដតិ. អកតមល្លកំ នាម ឯកទាឋិមំ បរិច្ឆិន្ទិត្វា កតំ. បាសាណាទយោ បាទឃំសនេ ឯវ កប្បិយា. ន្ហានកប្បវិនិច្ឆយោ.

ន្ហានកប្បនិទ្ទេសវណ្ណនា និដ្ឋិតា.